एजेन्सी– इन्डियन प्रिमियर लिग (आइपिएल) को ४४ औं खेलमा आज रोयल च्यालेन्जर्स बेंगलोर र चेन्नई सुपर किंग्सबीच प्रतिस्पर्धा हुँदैछ । खेल नेपाली समय अनुसार दिउँसो ३ : ४५ पछि दुई इन्टरनेशनल क्रिकेट स्टेडियममा सुरु हुनेछ ।

बेंगलोर आजको खेलमा विजयी भए १६ अंकका साथ शीर्षस्थानमा उक्लिने छ । आजको जितले बेंगलोरको प्ले अफमा स्थान लगभग पक्का पक्कि हुने छ । चेन्नई आजको खेलमा पराजित भएमा लिग चरणबाट औपचारिक रुपमा बाहिरिने छ । चेन्नई आजको खेलमा पराजित भए आइपिएल इतिहासमा लिग चरणबाट पहिलो पटक बाहिरिने छ ।

चेन्नई ११ खेलमा ८ मा हार र ३ मा जित सहित पुछारमा छ । बेंगलोर १० खेलमा ७ मा जित र ३ मा हार सहित १४ अंकका साथ तेस्रो स्थानमा छ । समान १४ अंक भएपनि नेट रन रेटको आधारमा मुम्बई इन्डियन्स शीर्ष र दिल्ली क्यापिटल्स दोस्रो स्थानमा छन् ।

यसअघि लिग चरणको पहिलो खेलमा चेन्नई बेंगलोरसँग ३७ रनले पराजित भएको थियो । बेंगलोरका क्रिस मोरिस, युजभेन्द्र चहल र एबी डिभिलियर्स प्रमुख हतियार हुन् । चेन्नईका साम करन, फाफ डु प्लेसिस र महेन्द्रसिंह धोनी प्रमुख हतियार हुन् । चेन्नई पछिल्लो खेलमा मुम्बई इन्डियन्ससँग १० विकेटले पराजित भएको थियो ।

आइपिएल इतिहासमा चेन्नई पहिलो पटक १० विकेटले पराजित हुन पुगेको हो । चेन्नईलाई कमजोर ब्याटिङ प्रमुख समस्याको रुपमा छ । बेंगलोरले पछिल्लो खेलमा कोलकाता नाइट राइडर्सलाई ८ विकेटले पराजित गरेको थियो । आइपिएलमा चेन्नई र बेंगलोरबीच हालसम्म कुल २५ खेल भएको छ । चेन्नई १५ खेलमा विजयी हुँदा ९ खेलमा पराजित हुन पुगेको छ ।