एजेन्सी– इन्डियन प्रिमियर लिग (आइपिएल) को ४३ औं खेलमा किंग्स इलेभेन पन्जाबले सनराइजर्स हैदराबादलाई १ सय २७ रनको मध्यम लक्ष्य दिएको छ ।

दुबई इन्टरनेशल क्रिकेट स्टेडियममा टस हारेर ब्याटिङ थालेको पन्जाबले २० ओभरमा ७ विकेटको क्षतिमा १ सय २६ रन बनायो । पन्जाबको लागि निकोलस पूरनले २८ बलमा २ चौका सहित सर्वाधिक ३२ रनको योगदान दिए ।

पन्जाबले पाँचौ ओभरको अन्तिम बलमा ओपनर मनदीप सिंहलाई १७ रनमा गुमाएको थियो । सन्दीप शर्माको बलमा राशिद खानबाट क्याच आउट हुनुअघि सिंहले १४ बलमा १ चौका प्रहार गरे । १० औं ओभरको अन्तिम बलमा आक्रामक ब्याट्सम्यान क्रिस गेललाई जेसन होल्डरले डेभिड वार्नरबाट लङअफमा २० रनमा क्याच आउट हुन पुगे । गेलले २० बलमा २ चौका र १ छक्का प्रहार गरे ।

११ औं ओभरको पहिलो बलमा कप्तान लोकेश राहुललाई राशिदले २७ रनमा बोल्ड आउट गरे । राहुलले २७ बलमा २ चौका र १ छक्का प्रहार गरे । लगातार खराब प्रर्दशन गर्दै आएका ग्लेन म्याक्सवेलले हैदराबादविरुद्ध पनि पन्जाबलाई निराश बनाउन पुगे । सन्दीपले म्याक्सवेललाई १४ औं ओभरको चौथो बलमा १२ रनमा क्याच आउट गराएपछि पन्जाब समस्यामा परेको थियो । १५ औं ओभरको दोस्रो बलमा दीपक हुडालाई राशिदले शून्यमा स्टम्पिङ आउट गराए ।

जेसन होल्डरले ४ ओभरमा २७ रन खर्चेर २ विकेट लिए । राशिद खानले ४ ओभरमा १४ रन खर्चेर २ विकेट लिए । सन्दीप शर्माले ४ ओभरमा २९ रन खर्चेर २ विकेट हात पारे ।