एजेन्सी– इन्डियन प्रिमियर लिग (आइपिएल) को ४२ औं खेलमा आज दिल्ली क्यापिटल्स र कोलकाता नाइट राइडर्सबीच प्रतिस्पर्धा हुँदैछ । खेल नेपाली समय अनुसार ३ : ४५ पछि शेख जायद स्टेडियम आबूधाबीमा सुरु हुनेछ ।

दिल्ली कोलकातालाई हराउँदै शीर्षस्थानमा उक्लिन चाहन्छ । दिल्ली आजको खेलमा विजयी भए प्ले अफ लगभग पक्का पक्कि हुने छ । कोलकातालाई अन्तिम चारमा रहेर प्ले अफ खेल्ने सम्भावना बलियो बनाउन आजको खेल जित्नै पर्ने हुन्छ ।

दिल्ली १० खेलमा ७ मा जित र ३ मा हार सहित १४ अंकका साथ दोस्रो स्थानमा छ । कोलकाता १० खेलमा समान ५ मा जित र हार सहित चौथो स्थानमा छ । यसअघि लिग चरणको पहिलो खेलमा दिल्लीले कोलकातालाई १८ रनले पराजित गरेको थियो ।

दिल्लीले प्रस्तुत गरेको २ सय २९ रनको विजयी लक्ष्य पछ्याउने क्रममा कोलकाता ८ विकेटको क्षतिमा २ सय १० रनमा समेटिएको थियो । दुवै टोली पछिल्लो खेलमा पराजित भएका छन् । दिल्ली किंग्स इलेभेन पन्जाबसँग ५ विकेटले र कोलकाता रोयल च्यालेन्जर्स बेंगलोरसँग ८ विकेटले पराजित हुन पुगेका थिए ।

दिल्लीका ओपनर शिखर धवन उत्कृष्ट लयमा छन् । धवनले पछिल्ला दुई खेलमा पन्जाब र चेन्नईविरुद्ध लगातार शतक प्रहार गरेका थिए । धवनको लय दिल्लीको प्रमुख हतियार हुन् । कोलकाता बलरलाई धवन टाउको दुखाईका ब्याट्सम्यान बन्न सक्छन् । तर अर्का ओपनर पृथ्वी शा भने पछिल्लो खेलमा खराब प्रर्दशन गरि रहेका छन् । उनलाई उत्कृष्ट प्रर्दशन गर्न आवश्यक छ ।

कप्तान श्रेयस ऐर, ऋषभ पन्त र शिम्रन हेटमायरको प्रर्दशनले मध्यक्रम निकै प्रभाव पार्ने छ । मार्कस स्टोइनिस कोलकातालाई टाउको दुखाई बन्न सक्ने अलराउन्डर हुन् । तीव्र गतिका बलर कागिसो रबाडा दिल्लीका प्रमुख हतियार हुन् । १० खेलमा २१ विकेट लिएका छन् । पन्जाबविरुद्ध ४ ओभरमा ३० रन खर्चेका ड्यानियल साम्सको स्थानमा एनरिच नोर्कियालाई मौका दिन सक्छ । २ ओभरमा ४१ रन खर्चेका तुषार देशपान्डेको स्थानमा मोहित शर्मा वा हर्षल पटेल मध्य एकलाई स्थान दिन सक्छ । नेपाली स्पिनर सन्दीप लामिछानेको दिल्लीमा आजको खेलमा पनि सम्भावना देखिदैन ।

कोलकाता पछिल्लो खेलमा बेंगलोरसँग ८४ रनमा समेटिएको थियो । उक्त प्रर्दशनलाई बिर्सेर कोलकाता उच्च प्रर्दशन गर्न चाहन्छ । उक्त खेलमा कप्तान ओईन मोर्गनले सर्वाधिक ३० रनको योगदान दिएका थिए । ओपनर सुभमन गिल नितेश राणा, राहुल त्रिपाठी र विकेटकिपर दीनेश कार्तिकले लगातार कमजोर प्रर्दशन गर्दै आएका छन् । यी चार ब्याट्सम्यानलाई उत्कृष्ट प्रर्दशन गर्न आवश्यक छ ।

कप्तान मोर्गनको प्रर्दशन कोलकातालाई निकै महत्त्वपूर्ण हुने छ । बलिङमा तीव्र गतिका बलर लोकी फर्गुसन प्रमुख हतियार हुन् । उनले खेलेका पछिल्ला दुबै खेलमा उच्च प्रर्दशन गरेका थिए । फर्गुसन देखि दिल्लीका ब्याट्सम्यान सहज हुन आवश्यक देखिन्छ ।

बरुण चक्रबर्तीको स्थानमा शिवम माभीलाई मौका दिन सक्छ । प्याट कमिन्सले अपेक्षा अनुसार प्रर्दशन गर्न नसक्नु कोलकातालाई अर्को चिन्ताको विषय हो । घाइते आन्द्रे रसेल र सुनिल नारायणले आजको खेल खेल्ने वा नखेल्ने अनिश्चित छ । यी दुबै खेलाडी उपलब्ध नभए टम ब्यान्टनले टोलीमा निरन्तरता पाउने छन् । आइपिएलमा यी दुई टोलीबीच २५ खेल भएको छ । कोलकाता १३ खेलमा विजयी हुँदा ११ खेलमा पराजित हुन पुगेको छ ।

आइपिएलको अंक तालिका

मुम्बई १० खेलमा ७ मा जित र ३ मा हार सहित १४ अंकका साथ नेटरन रेटको आधारमा शीर्षस्थानमा छ । समान १४ अंक भएपनि नेटरन रेटको आधारमा मुम्बई, दिल्ली र बेंगलोर क्रमश पहिलो, दोस्रो र तेस्रो स्थानमा छन् । दिल्ली क्यापिटल्स १० खेलमा ७ मा जित र ३ मा हार बेहोरेको छ । बेंगलोर १० खेलमा ७ मा जित र ३ मा हार सहित तेस्रो स्थानमा छ । कोलकाता १० खेलमा ५ मा जित र ५ मा हार सहित चौथो स्थानमा छ । सनराइजर्स हैदराबाद १० खेलमा ६ मा हार र ४ मा जित सहित पाँचौ स्थानमा छ ।

पन्जाब १० खेलमा ६ मा हार र ४ मा जित सहित ८ अंक जोड्दै छैटौं स्थानमा छ । राजस्थान ११ खेलमा ७ मा हार र ४ मा जित सहित सातौं स्थानमा पुगेको छ । चेन्नई सुपर किंग्स ११ खेलमा ८ मा हार र ३ मा जित सहित पुछारमा छ ।