एजेन्सी – इन्डियन प्रिमियर लिग (आइपिएल) को ४० औं खेलमा आज राजस्थान रोयल्स र सनराइर्जस हैदराबादबीच प्रतिस्पर्धा हुँदैछ । खेल नेपाली समय अनुसार बेलुका ७ : ४५ पछि दुबई इन्टरनेशल क्रिकेट स्टेडियममा सुरु हुनेछ ।

दुबै टोलीलाई प्ले अफको सम्भावना कायमै राख्न आजको खेल जित्नै पर्ने हुन्छ । आजको खेलमा पराजित हुने टोलीको प्ले अफको सम्भावना अन्य टोलीको नजितामा निर्भर रहने छ । राजस्थान १० खेलमा ६ मा हार र ४ मा जित सहित छैटौं स्थानमा छ । हैदराबाद ९ खेलमा ६ मा हार र ३ मा जित सहित सातौं स्थानमा छ ।

यसअघि लिग चरणको पहिलो खेलमा हैदराबाद राजस्थानसँग ५ विकेटले पराजित भएको थियो । उक्त खेलमा राहुल टेवाटियाले ४५ र रिगान पराग ४२ रनमा अविजित थिए । हैदराबाद उक्त हारको बदला लिने सोचमा हुने छ । राजस्थान उक्त जितलाई निरन्तरता दिन चाहन्छ ।

राजस्थानले पहिलो खेलमा चेन्नई सुपर किंग्सलाई ७ विकेटले पराजित गरेको थियो । उक्त खेलमा जस बटलरले ७० रनको अविजित इनिङ खेलेका थिए । बटलरको उक्त प्रर्दशन राजस्थानको सकरात्मक पक्ष हो । स्टिभ स्मिथ २६ रनमा अविजित रहेका थिए । ओपनर बेन स्टोक्स र रोबिन उथप्पा सस्तैमा आउट भएका थिए । सन्जु स्यामसनले खाता खोल्न सकेका थिएनन् । उथप्पाको स्थानमा युवा ब्याट्सम्यान यशस्वी जैसवाललाई मौका दिन सक्छ ।

सुरुवाती दुई खेलमा उच्च प्रर्दशन गरेका स्यामसनले त्यसपछि लगातार खराब प्रर्दशन गर्दै आएका छन् । जुन राजस्थानको ठूलो समस्या र टाउको दुखाईको विषय हो । स्यामसनलाई आफ्नो लय समाउन निकै आवश्यक देखिन्छ । बेन स्टोक्सलाई उत्कृष्ट इनिङ खेल्न आवश्यक छ । जोफ्रा आर्चर बलिङका प्रमुख हतियार हुन् ।

हैदराबाद पछिल्लो खेलमा कोलकाता नाइट राइडर्ससँग सुपर ओभरमा पराजित भएको थियो । ओपनर जोनी बेयरस्टो, कप्तान डेभिड वार्नर, केन विलियम्सन र मनिष पान्डेमा हैदराबादको ब्याटिङ निर्भर छ । त्यसैले यी चार ब्याट्सम्यानले जिम्मेवारीका साथ उत्कृष्ट प्रर्दशन गर्न आवश्यक देखिन्छ । अब्दुल सामद, विजय शंकर र प्रियम गर्ग तल्लोक्रमका ब्याट्सम्यान हुन् ।

लगातार मध्यक्रम कमजोर देखिएको हैदराबादले त्यस समस्या समाधानको लागि युवा ब्याट्सम्यान विराट सिंहलाई गर्गको स्थानमा आज मौका दिन सक्छ । बलिङमा राशिद खान र टि नटराजन प्रमुख हतियार हुन् । योर्करका लागि सिपालु नटराजन राजस्थानका बलरलाई टाउनको दुखाईका बलर बन्न सक्छन् ।

आइपिएलमा राजस्थान र हैदराबादबीच कुल १२ खेल भएको छ । जसमा हैदराबाद ६ खेलमा विजयी हुँदा ६ खेलमा पराजित हुन पुगेको छ ।