एजेन्सी– इन्डियन प्रिमियर लिग (आइपिएल) को ३९ औं खेलमा कोलकाता नाइट राइडर्सले रोयल च्यालेन्जर्स बेंगलोरविरुद्ध पहिला ब्याटिङ गर्ने भएको छ ।

शेख जायद स्टेडियम आबूधाबीमा कोलकाता कप्तान ओईन मोर्गनले टस जितेर पहिला ब्याटिङ गर्ने निर्णय लिएका हुन् । बेंगलोरले आज टोलीमा एक परिवर्तन गरेको छ । तीव्र गतिका बलिङ बलियो बनाउन शहबाज अहमदको स्थानमा मोहम्मद शिराजलाई मौका दिएको छ । कोलकाताले टोलीमा दुई परिवर्तन गरेको छ ।

घाइते आन्द्रे रसेल आज टोलीमा छैनन् । रसेल टोलीमा नहुँदा ब्याटिङ बलियो बनाउन इंग्ल्यान्डका युवा ओपनर टम ब्यान्टनलाई मौका दिएको छ । त्यस्तै तीव्र गतिका बलर शिवम माभीको स्थानमा प्रसिद्ध कृष्णालाई मौका दिएको छ ।

बेंगलोर कोलकातामाथि उत्कृष्ट जित निकाल्दै शीर्षस्थानमा उक्लिन चाहाँन्छ । कोलकाता बेंगलोरलाई हराउँदै छैटौं जितका साथ प्ले अफमा आफ्नो सम्भावना बलियो बनाउन चाहन्छ । बेंगलोर ९ खेलमा ६ मा जित र ३ मा हार सहित १२ अंकका साथ तेस्रो स्थानमा छ । कोलकाता नाइट राइडर्स ९ खेलमा ५ मा जित र ४ मा हार सहित चौथो स्थानमा छ । लिग चरणको पहिलो खेलमा बेंगलोरले कोलकातालाई ८२ रनले पराजित गरेको थियो ।

कोलकाता प्लेइङ ११ – ल्योकी फर्गुसन, सुभमन गिल, नितेश राणा, ओईन मोर्गन (कप्तान), टम ब्यान्टन, दिनेश कार्तिक (विकेटकिपर), प्रसिद्ध कृष्णा, प्याट कमिन्स, राहुल त्रिपाठ्ठी, वरुण चकबर्ती र कुलदिप यादव ।

बेंगलोरको प्लेइङ ११ – आरोन फिन्च, देवदत्त पाडिक्कल, विराट कोहली (कप्तान) एवी डि भिलियर्स, क्रिस मोरिस, मोहम्मद शिराज, वासिन्टन सुन्दर, गुरकिरत सिंहमान, नवदीप सैनी, इसुरु उडना र युजभेन्द्र चहल