एजेन्सी – इन्डियन प्रिमियर लिग (आइपिएल) को ३१ औं खेलमा रोयल च्यालेन्जर्स बेंगलोरले किंग्स इलेभेन पन्जाबलाई १ सय ७२ रनको मध्यम लक्ष्य दिएको छ ।

शारजाह क्रिकेट स्टेडियममा टस जितेर पहिला ब्याटिङ गरेको बेंगलोरले निर्धारित २० ओभरमा ६ विकेटको क्षतिमा १ सय ७१ रन बनायो । मोहम्मद शामीले अन्तिम ओभरमा तीन छक्का र एक चौका सहित कुल २४ रन खर्चेका थिए । क्रिस मोरिस ८ बलमा ३ छक्का र १ चौका सहित २५ रनमा अविजित रहे । इसुरु उडाना ५ बलमा १ छक्का सहित १० रनमा अविजित रहे ।

बेंगलोरले सुरुवात मध्यम गरेको थियो । ओपनर आरोन फिन्च र देवदत्त पाडिक्कलले पाँचौ ओभरको पहिलो बलमा ३८ रनको साझेदारी गरेका थिए । युवा तीव्र गतिका बलर अर्शदीप सिंहले पाडिक्कललाई निकोलस पुरनबाट १८ रनमा क्याच आउट गराउँदै पहिलो सफलता दिलाए । पाडिक्कले १२ बलमा १ चौका र १ छक्का प्रहार गरे । सातौं ओभरको तेस्रो बलमा स्पिनर मुरुगन आश्विनले फिन्चलाई २० रनमा बोल्ड आउट गरे । फिन्चले १८ बलमा २ चौका र १ छक्का प्रहार गरे ।

११ औं ओभरको तेस्रो बलमा आश्विनले वासिन्टन सुन्दरलाई १३ रनमा क्रिस जोर्डनबाट क्याच आउट गराए । सुन्दरले १४ बलमा १ चौका प्रहार गरे । जोर्डनले १६ औं ओभरको अन्तिम बलमा शिवम दुबेलाई कप्तान लोकेश राहुलबाट २३ रनमा क्याच आउट गराए । दुबेले १९ बलमा २ छक्का प्रहार गरे ।

१८ औं ओभरको तेस्रो बलमा मोहम्मद शामीले आक्रामक ब्याट्सम्यान एवि डिभिलियर्सलाई दीपक हुडाबाट दुई रनमा क्याच आउट गराएपछि बेगलोरको ठूलो योगफलको सम्भावना सकिएको थियो । डी भिलियर्स आउट भएको दुई बल पछि कोहली राहुलबाट ४८ रनमा क्याच आउट भए । कोहलीले ३९ बलमा ३ चौका प्रहार गरे ।

स्पिनर मुरुगन आश्विनले ४ ओभरमा २३ रन खर्चेर २ विकेट लिए । मोहम्मद शामीले ४ ओभरमा ४५ रन खर्चेर २ विकेट लिए । क्रिस जोर्डन र अर्शदीप सिंहको नाममा समान एक एक विकेट रह्यो ।