एजेन्सी– इन्डियन प्रिमियर लिग (आइपिएल) को २९ औं खेलमा चेन्नई सुपर किंग्सले सनराइजर्स हैदराबादलाई १ सय ६८ रनको प्रतिस्पर्धात्मक लक्ष्य दिएको छ ।

दुबई इन्टरनेशल क्रिकेट स्टेडियममा टस जितेर ब्याटिङ रोजेको चेन्नईले निर्धारित २० ओभरमा ६ विकेटको क्षतिमा १ सय ६७ रन बनायो । चेन्नईले अन्तिम पाँच ओभरमा ५१ रन जोड्दा ४ विकेट गुमाएको थियो । चेन्नईका अलराउन्डर रविन्द्र जडेजाले तल्लोक्रममा आक्रामक रुपमा रन जोड्दै १० बलमा ३ चौका र १ छक्का सहित २५ रनमा अविजित रहे ।

चेन्नईले आज ओपनिङ जोडीमा परिवर्तन गर्दै युवा अलराउन्डर साम करनलाई फाफ डु प्लेसिससँग मैदान उतारेको थियो । सन्दीप शर्माको तेस्रो ओभरको पहिलो बलमा एज लाग्दै विकेटकिपर जोनी बेयरस्टोबाट क्याच हुँदै डु प्लेसिस गोल्डेन डग आउट हुन पुगे ।

त्यसपछि करनले आक्रामक ब्याटिङ गर्दै चेन्नईका ब्याट्सम्यानलाई दबाब महसुस हुन दिएनन् । सन्दीप शर्माले पाँचौ ओभरको चौथो बलमा बोल्ड आउट गर्नुअघि करनले २१ बलमा ३ चौका र २ छक्का सहित ३१ रनको योगदान दिए ।

तेस्रो विकेटका लागि अम्बाती रायुडु र वाटसनले ८१ रनको साझेदारी गर्दै चेन्नईलाई राम्रो योगफलको बाटो देखाए । तर यी दुबै ब्याट्सम्यान एक ओभरको अन्तरमा क्याच आउट हुन पुगे । खलिल अहमदको १६ औं ओभरको दोस्रो फुलटस बलमा छक्काको लागि प्रयास गरेका रायुडु लङअफमा कप्तान डेभिड वार्नरको हातबाट ४१ रनमा समातिन पुगे ।

रायुडुले ३४ बलमा ३ चौका र २ छक्का प्रहार गरे । टि नटराजनको १७ औं ओभरको दोस्रो बलमा ठूलो सट खेल्ने धुनमा वाटसन मनिष पान्डेबाट लङअफमै ४२ रनमा क्याच आउट हुन पुगे । वाटसनले ३८ बलमा १ चौका र ३ छक्का प्रहार गरे ।

टि नटराजनको १९ औं ओभरको अन्तिम बलमा ठूलो सट खेलेका महेन्द्रसिंह धोनी केन विलियम्सनबाट २१ रनमा क्याच आउट भएका थिए । धोनीले १३ बलमा २ चौका र १ छक्का प्रहार गरे । ड्वने ब्राभोलाई अन्तिम ओभरको पहिलो बलमै खलिलले बोल्ड आउट गरे । दीपक चहर २ रनमा अविजित रहे ।

सन्दीप शर्माले ४ ओभरमा १९ रन खर्चेर २ विकेट लिए । टि नटराजनले ४ ओभरमा ४१ रन खर्चेर २ विकेट लिए । खलिल अहमदले ४ ओभरमा ४५ रन खर्चेर २ विकेट लिए ।