एजेन्सी – इन्डियन प्रिमियर लिग (आइपिएल) को २९ औं खेलमा चेन्नई सुपर किंग्सले सनराइजर्स हैदराबादविरुद्ध पहिला ब्याटिङ गर्ने भएको छ ।

दुबई इन्टरनेशल क्रिकेट स्टेडियममा चेन्नईका कप्तान महेन्द्रसिंह धोनीले टस जित्दै पहिला ब्याटिङ गर्ने निर्णय लिएका हुन् । चेन्नईले आज टोलीमा एक परिवर्तन गरेको छ । युवा ब्याट्सम्यान नारायण जगदेसनको स्थानमा अनुभवी स्पिनर पियुष चवलालाई मौका दिएको छ । हैदराबादले पनि टोलीमा एक परिवर्तन गरेको छ । युवा अलराउन्डर अभिषेक शर्माको स्थानमा शहवाज नदीमलाई मौका दिएको छ । अनुभवी स्पिनर नदीमले तल्लोक्रममा राम्रो ब्याटिङ पनि गर्ने गर्दछन् ।

हैदराबाद ७ खेलमा ३ मा जित र ४ मा हार सहित पाँचौ स्थानमा छ । चेन्नई ७ खेलमा ५ मा हार र २ मा जित सहित सातौं स्थानमा छ । आइपिएलमा चेन्नई र हैदराबादबीच कुल १३ खेल भएको छ । जसमा चेन्नई ९ खेलमा विजयी हुँदा ४ खेलमा पराजित भएको छ । जारी सिजनको पहिलो खेलमा चेन्नई हैदराबादसँग ७ रनले पराजित हुन पुगेको थियो । १ सय ६५ रनको विजयी लक्ष्य पछ्याएको चेन्नई ५ विकेटको क्षतिमा १ सय ५७ रन बनाउन सकेको थियो ।

हैदराबादको प्लेइङ ११ – डेविड वार्नर (कप्तान), जोनी बेयरस्टो (विकेटकिपर), मनिष पान्डे, विजय शंकर, प्रियम गर्ग, शहबाज नदीम, केन विलियम्सन, राशिद खान, सन्दीप शर्मा , टि नटराजन र खलिल अहमद

चेन्नई प्लेइङ ११ – अम्बाती रायुडू, शेन वाटसन, फाफ डु प्लेसिस, शार्दुल ठाकुर, पियुष चवला, महेन्द्र सिंह धोनी (कप्तान तथा विकेटकिपर), रविन्द्र जडेजा, साम करन, दीपक चहर, करण शर्मा र ड्वेन ब्राभो