एजेन्सी – ओपनर शिखर धवनको अर्ध शतकको सहयोगमा इन्डियन प्रिमियर लिग (आइपिएल) को २७ औं खेलमा दिल्ली क्यापिटल्सले मुम्बई इन्डियन्सलाई १ सय ६३ रनको मध्यम लक्ष्य दिएको छ ।

शेख जायद स्टेडियम आबूधाबीमा टस जितेर ब्याटिङ रोजेको दिल्लीले २० ओभरमा ४ विकेटको क्षति १ सय ६२ रन बनायो । दिल्लीका ओपनर शिखर धवन ५२ बलमा ६ चौका र १ छक्का सहित ६९ रनमा अविजित रहे । दिल्लीले अन्तिम २४ बलमा बाउन्ड्रीको रुपमा दुई मात्र चौका प्रहार गर्न सक्यो । दिल्लीले अन्तिम २४ बलमा एक विकेट गुमाउँदा ३५ रन जोडेको थियो ।

दिल्लीले पहिलो ओभरको तेस्रो बलमै ओपनर पृथ्वी शालाई ४ रनमा गुमाएको थियो । तीव्र गतिका बलर ट्रेन्ट बोल्टको बलमा शा क्रुनाल पान्ड्याबाट क्याच आउट हुन पुगेका थिए । पाँचौं ओभरको दोस्रो बलमा क्रुनाल पान्ड्याले अजिंक्या रहाणेलाई १५ रनमा एलबिडब्लू आउट गरे । रहाणेले १५ बलमा ३ चौका प्रहार गरे ।

तेस्रो विकेटका लागि कप्तान श्रेयस ऐर र धवनले ८५ रनको साझेदारी गर्दै मुम्बईका बलरलाई दबाबमा राखेका थिए । क्रुनालको १५ औं ओभरको चौथो बलमा ठूलो सट खेलेका ऐर बोल्टबाट उत्कृष्ट क्याच आउट हुन पुगेपछि ४२ रनमा पेभिलिएन फर्के । ऐरले ३३ बलमा ५ चौका प्रहार गरे ।

१७ औं ओभरको तेस्रो बलमा मार्कस स्टोइनिसले धवनसँग तालमेल गर्न नसक्दा १३ रनमा रन आउट भए । राहुल चहरले रन आउट गर्नुअघि स्टोइनिसले ८ बलमा २ चौका प्रहार गरे । डेब्यु खेल खेलेका विकेटकिपर एलेक्स केरी ९ बलमा १४ रनमा अविजित रहे ।

क्रुनाल पान्ड्याले ४ ओभरमा २६ रन खर्चेर २ विकेट लिए । ट्रेन्ट बोल्टले ४ ओभरमा ३६ रन खर्चेर १ विकेट लिए ।