काठमाडौं (हाम्रो खेलकुद) – गण्डकी प्रादेशिक क्रिकेट संघले आफ्नो प्रादेशिक टोलीको १८ पुरुष खेलाडीको कोरोना विमा गर्ने भएको छ ।

शुक्रबार पोखरामा बसेको प्रादेशिक संघको कार्य सम्पादन समितिको बैठकले पछिल्लो पटक राष्ट्रिय प्रतियोगिता खेलेका पुरुष १४ र ४ वैकल्पिक गरि कुल १८ खेलाडीको कोरोना विमा गर्ने निर्णय गरेको सचिव समुनराज कार्कीले जानकारी दिएका छन् । अध्यक्ष देवेन्द्र प्रजुको अध्यक्षतामा बसेको बैठकले पुरुष खेलाडीको कोरोना विमा गर्ने लगायतका विभिन्न निर्णय गरेको हो ।

गण्डकी प्रदेशको पुरुष टोलीले अन्तिम पटक माघमा सुनसरीको इनरुवामा सम्पन्न मनमोहन मेमोरियल एकदिवसिय प्रतियोगिता खेलेको थियो । उक्त प्रतियोगितामा गोविन्द प्रधानले कप्तानी गर्दा किशोर महतो, दीपेश श्रेष्ठ र बिपिन खत्री लगायतका खेलाडीहरु गण्डकी प्रदेशबाट खेलेका थिए ।

त्यस्तै बैठकले नेपाल क्रिकेट संघ (क्यान) को वार्षिक साधरण सभामा अध्यक्ष देवेन्द्र र सचिव सुमनलाई पठाउने निर्णय गरेको छ । क्यानको बार्षिक साधारण सभा असोज २८ र २९ मा गर्ने भनेपनि पछिल्लो समय बढ्दै गएको कोरोना महामारीको कारण अनिश्चित बनेको छ । अझ क्यानका अध्यक्ष चतुरबहादुर चन्द र सचिव अशोकनाथ प्याकुरेल दुबैलाई कोरोना संक्रमण देखिएपछि वार्षिक साधरण सभा अन्यौलमा रहँदै आएको छ ।

गण्डकी संघले पोखराको पशुपती घाटमा बन्न लागेको क्रिकेट रंगशाला निर्माणको प्रदेश सरकारले सार्वजनिक गरेको विस्तृत परियोजना विवरण ‘डिपिआर’ लाई स्वागत गर्दै त्यसलाई सम्पन्न गर्न प्रादेश कमिटि सक्रिय रुपमा लाग्ने निर्णय गरेको छ । तत्काल कार्यलय व्यवस्थापन गरेर कामकाज अगाडि बढाउने पनि निर्णय पनि गरेको छ ।