एजेन्सी – ओपनर राहुल त्रिपाठीको अर्धशतकको सहयोगमा इन्डियन प्रिमियर लिग (आइपिएल) २०२० को २१ औं खेलमा कोलकाता नाइट राइडर्सले चेन्नई सुपर किंग्सलाई १ सय ६८ रनको लक्ष्य दिएको छ ।

शेख जायद स्टेडियम आबूधाबीमा टस जितेर पहिला ब्याटिङ रोजेको कोलकाता २० ओभरमा अल आउट हुँदै १ सय ६७ रन बनायो । कोलकातालाई प्रतिस्पर्धात्मक योगफलमा पुर्याउन ओपनर राहुल त्रिपाठीले सर्वाधिक ८१ रनको योगदान दिए । ड्वेन ब्राभोको १७ औं ओभरको पाँचौ बलमा शेन वाटसनबाट क्याच आउट हुनुअघि त्रिपाठीले ५१ बलमा ८ चौका र ३ छक्का प्रहार गरे । त्रिपाठीलाई अन्य ब्याट्सम्यानले राम्रो साथ दिन नसक्दा कोलकाता विशाल योगफल बनाउनबाट चुकेको हो ।

पाँचौ ओभरको दोस्रो बलमा शार्दुल ठाकुरले ओपनर सुभमन गिललाई धोनीबाट ११ रनमा क्याच गराउँदै चेन्नईलाई पहिलो सफलता दिलाए । कोलकाताले आजको खेलमा ओपनिङ जोडीमा परिवर्तन गरेको थियो । सुरुवाती चार खेलमा खराब प्रर्दशन गरेको अलराउन्डर सुनिल नारायणको स्थानमा राहुल त्रिपाठीलाई ओपनिङ गराउने निर्णय लिएको थियो । पहिलो विकेटका लागि त्रिपाठी र गिलले ३७ रनको साझेदारी गरेका थिए ।

लेग स्पिनर करण शर्माले नवौं ओभरको पहिलो बलमा नितेश राणालाई रविन्द्र जडेजाबाट ९ रनमा क्याच आउट गराए । शर्मालेनै ११ औं ओभरको अन्तिम बलमा नारायणलाई १७ रनमा फाफ डु प्लेसिसबाट उत्कृष्ट क्याच आउट गराए । डिप मिड विकेटमा उत्कृष्ट क्याच हुनुअघि नारायणले ९ बलमा १ चौका र १ छक्का प्रहार गरे ।

साम करनको १४ औं ओभरको अन्तिम बाउन्सर बलमा सट खेल्न खोजेका ओईन मोर्गन एज लागेर धोनीबाट ७ रनमा क्याच आउट हुन पुगे । ठाकुरको १६ औं ओभरको दोस्रो बलमा आन्द्रे रसेल एज लाग्दै धोनीबाट २ रनमा क्याच आउट हुन पुगेपछि कोलकाता १२८–५ को अवस्थामा पुगेको थियो । साम करनको १९ औं ओभरको अन्तिम बलमा ठूलो सट खेलका कप्तान दिनेश कार्तिक ठाकुरबाट १२ रनमा क्याच आउट हुन पुगे । प्याट कमिन्स ९ बलमा १ चौका र १ छक्का सहित १७ रनमा अविजित रहे ।

करण शर्माले ४ ओभरमा २५ रन खर्चेर २ विकेट लिए । शार्दुल ठाकुरले ४ ओभरमा २८ रन २ खर्चेर विकेट लिए । साम करनले ४ ओभरमा २६ रन खर्चेर २ विकेट हात पारे । ड्वेन ब्राभोले ४ ओभरमा ३७ रन खर्चेर ३ विकेट लिए । दीपक चहर सर्वाधिक महँगो बलर सावित भए । उनले ४ ओभरमा ४७ रन खर्चे ।