काठमाडौं (हाम्रो खेलकुद) – सडक दुर्घटनामा परि घाइते भएका राष्ट्रिय बायाँ हाते तीव्र गतिका बलर ललितसिंह भण्डारीको डिस्चार्जसँगै क्रिकेट खेलाडी संघ नेपाल (सिप्यान) ले उनको सहयोगार्थ संचालन गरिएको अभियानमा उठेको नगद हस्तान्तरण गरेको छ ।

मंगलबार सिप्यानका अध्यक्ष मनिषराज पान्डे, महासचिव पारस खड्का र कोषाअध्यक्ष पृथ्थु बास्कोटा ग्रान्डी अस्पतालमा पुगेर समर्थक र सुभचिन्तकबाट संकलित कुल ६ लाख २८ हजार रुपैयाँ ललितको श्रीमती ममता भण्डारीलाई हस्तान्तरण गरेका हुन् । साथै सिप्यानले सिम्रिक एयरबाट उपचारको लागि ललितलाइ काठमाडौं ल्याउनको लागि रु ३ लाख ८० हजार समेत सम्बन्धित कम्पनिलाइ भुक्तानी गरेको जानकारी दिएको छ ।

सिप्यानले थालेको संकलन अभियानमा कुल रकम रु १० लाख ८ हजार संकलन भएको थियो । संघले ललितको उपचारमा सहयोग, शुभेच्छा प्रदान गर्नु हुने सम्पूर्णमा क्रिकेट खेलाडी संघ हार्दिक आभार प्रकट गरेको छ । सिप्यानले ललितको उपाचारमा सहयोग गर्न सुरुवात देखिनै आग्रह गर्दै आएको थियो ।

गत भदौ २८ मा झलारी बजारमा ललित र उनका नातेदार करण ठगुन्ना सवार मोटरसाईकललाई ट्रकले ठक्कर दिँदा गम्भीर घाइते भएका थिए । अचेत अवस्थामा रहेका ललितलाई धनगढीको निसर्ग अस्पताल हुँदै राती नै बाँकेस्थित कोहलपुर शिक्षण अस्पतालमा उपचार ल्याइएको थियो ।

कोहलपुरमा उनको पूर्ण उपचार हुन नसकेपछि उनलाई सिम्रिक एरको हेलिकप्टरमार्फत ग्राण्डीमा ल्याइएको थियो । दुर्घटनामा परि ललितको दायाँ हात, खुट्टा, टाउको र छातीमा चोट लागेको थियो । हातको कुम, एंकल लगायतका भागहरुमा चोट लागेको थियो । उनको हातको तीन भाग र खुट्टाको एक भागमा शल्यक्रिया भएको थियो ।