एजेन्सी – भारतीय यू१९ क्रिकेट टोलीका कप्तान समेत रहेका युवा ब्याट्सम्यान प्रियम गर्गको उत्कृष्ट अर्धशतकमा इन्डियन प्रिमियर लिग (आइपिएल) को १४ औं खेलमा सनराइजर्स हैदराबादले चेन्नई सुपर किंग्सलाई १ सय ६५ रनको लक्ष्य दिएको छ ।

दुबई इन्टरनेशल क्रिकेट स्टेडियममा टस जितेर ब्याटिङ गरेको हैदराबादले २० ओभरमा ५ विकेटको क्षतिमा १ सय ६४ रन बनायो । हैदराबादलाई प्रतिस्पर्धात्मक योगफलमा पुर्याउन गर्ग २६ बलमा ६ चौका र १ छक्का सहित ५१ रनमा अविजित रहे । गर्गले २३ बलमा आफ्नो पहिलो अर्ध शतक पूरा गरेका थिए ।

अभिषेक शर्माले २४ बलमा ४ चौका र १ छक्का सहित ३१ रनमा क्याच आउट भए । दिपक चहरको १८ औं ओभरको अन्तिम बलमा धोनीबाट क्याच आउट भएका थिए । खराब प्रर्दशन गरेको हैदराबादलाई पाँचौ विकेटका लागि दुई युवा ब्याट्सम्यान अभिषेक शर्मा र प्रियम गर्गले ७७ रनको साझेदारी गर्दै बलियो योगफलमा पुर्याएका थिए ।

टस जितेर पहिला ब्याटिङ गर्ने कप्तान डेभिड वार्नरको निर्णयलाई हैदराबादका शीर्षक्रमका ब्याट्सम्यानले सहि सावित गर्न सकेनन् । पहिलो ओभरको चौथो बलमा दिपक चहरले ओपनर जोनी बेयरस्टोलाई शून्यमा बोल्ड आउट आउट गरे । दोस्रो विकेटका लागि मनिष पान्डे र वार्नरले ४६ रनको साझेदारी गर्दै इनिङलाई सम्हाल्न खोजेका थिए ।

पान्डेलाई शार्दुल ठाकुरले आठौं ओभरको पहिलो बलमा टम करनबाट २९ रनमा क्याच आउट गराउँदै साझेदारीलाई बढ्न दिएनन् । पान्डेले २१ बलमा ५ चौका प्रहार गरे । ११ औं ओभरको पाँचौ बलमा वार्नर फाफ डु प्लेसिसबाट २८ बलमा क्याच आउट हुनपुगेपछि ठूलो योगफल कठिन बनेको थियो । स्पिनर पियुष चवलाको बलमा ठूलो सट खेलेका वार्नरलाई डु प्लेसिसले लङ अनमा उत्कृष्ट क्याच लिदै पेभिलिएन फर्काएका थिए । वार्नरले २९ बलमा ३ चौका प्रहार गरे ।

लगतै अर्को बलमा केन विलियम्सन ९ रनमा रन आउट भएपछि ठूलो योगफलको सम्भावना टाढिएको थियो । एक रन लिन प्रयास गर्दै पिजको मध्यभाग सम्म आएपनि नन स्ट्राइकका प्रियम गर्गले नमानेपछि विलियम्सन धोनीले रन आउटको शिकार बनेका थिए । उनले १३ बलमा १ चौका प्रहार गरे ।

चेन्नईका दिपक चहरले ४ ओभरमा ३१ रन खर्चेर २ विकेट लिए । पियुष चवला र शार्दुल ठाकुरको नाममा एक एक विकेट रह्यो ।