काठमाडौं (हाम्रो खेलकुद) – नेपाल क्रिकेट संघ (क्यान) ले मंगलबार सार्वजनिक गरेको राष्ट्रिय खेलाडीको केन्द्रिय सम्झौता २०२० लाई लिएर चौतर्फी आलोचना भइरहेको छ ।

क्यानले राष्ट्रिय १८ पुरुष र १९ महिला खेलाडीलाई केन्द्रिय सम्झौतामा राख्दै ‘ए’, ‘बी’ र ‘सी’ ग्रेड सार्वजनिक गरेको थियो । नेपाली क्रिकेट इतिहासमा क्यानले पहिलो पटक महिला टोलीलाई पारिश्रमिक दिने एक राम्रो कदमको थालनी गरेको हो । तर राम्रो सुरुवातको चर्चा हुनुको सट्टा झनै विवादमा पर्यो ।

केन्द्रिय खेलाडी सम्झौता ग्रेड र पारिश्रमिक निर्धारण गर्न क्यानले बनाएको समितिका संयोजक तथा कोषाअध्यक्ष रोशनकुमार सिंहले यस विवादलाई आगमी बोर्ड बैठक मार्फत मिलाउन प्रयास गर्ने बताएका छन् ।

‘ग्रेड निर्धारण र खेलाडी सम्झौतामा हामीबाट केहि कमजोरी र तल माथिको भएका होला । यो क्यानको आफ्नो घरभित्र परिवारको समस्या हो र घरको समस्या घरमै मिलाइनेछ । यो विषयमा विवाद गर्न आवश्यक छैन’, सिंहले हाम्रो खेलकुदसँग भने ।

क्यानको अबको बोर्ड बैठकबाट अहिले देखिएका विवादमा छलफल गर्दै मिलाउन प्रयास गरिने कोषाध्यक्ष सिंहले बताए । ‘ समर्थक र शुभचिन्तकले नेपाली क्रिकेटमाथि देखाइरहेको विश्वास र आशा कहिल्यै मर्न दिदैनौं,’ उनले थपे ।

क्यानले एक वर्षमा धेरै राम्रो काम गरेको दाबी गर्दै सिंहले तर, राम्रो कामको भन्दा नराम्रो काममात्र बढी चर्चा गरेको बताए । ‘क्यानका लागि सबै खेलाडी एकै हुन् । क्यानले कसैलाई पनि काखा र पाखा गरेको छैन, गर्दा पनि गर्दैन र गर्न पनि दिने छैन,’ सिंहले भने, ‘ क्रिकेट विकासकै लागि क्यानमा आएका हौं । क्रिकेट विकासबाहेक अन्य कुनै स्वार्थ छैन । हिड्ने क्रममा लड्न सकिन्छ । जुन विवाद अहिले आइरहेको छ त्यसमा आगामी बोर्ड बैठकमार्फत सुल्झाउन प्रयास गर्ने छौं ।’

खेलाडी वर्गीकरणका क्रममा सन् २०१९ मा नियमित खेल खेलेका स्पिनर ललित नारायण राजवंशीलाई सम्झौता सुचिमा नै नरहेपछि चर्को आलोचना भएको थियो । ग्रेड सार्वजनिक भएको केहि समयमै ललितलाई फोनमार्फत सिंहले गल्ति सुधार्ने बताइसकेका छन् ।

‘मैले ललितलाई फोन गरेर ग्रेडमा नाम आएन भन्दैमा नआत्तिनु भनेको थिएँ । भुलवबस उनको नाम छुट्न गएको हो । आफ्नो खेलमा ध्यान दिइराख्नु । यस विषयमा बृहत छलफल गर्दै बोर्ड बैठकमार्फत समधान गर्ने जानकारी दिएको थिए’, सिंहले भने ।

यता ललितले पनि ग्रेडमा आफ्नो नाम नपरेपछि कोषाध्यक्ष सिंहले सम्पर्क गरेको बताए । ‘सुरुमा नाम नसुन्दा म अचम्ममा परे । नियमित खेलिरहेको थिए। प्रर्दशन पनि भइरहेको थियो’, ललितले भने , ‘पछि कोषाध्यक्षले फोन गर्नुभएको थियो । हामी मिलाएर लैजान्छौं । जे भयो भयो अन्यथा नलिनु भन्नु भएको थियो’, ललितले भने ।

यो पनि :

ग्रेड विभाजनमा क्यानको गम्भिर लापरवाही

महिला क्रिकेटमा सम्झौता : पहिलो गासमै ढुंगा