एजेन्सी – इन्डियन प्रिमियर लिग (आइपिएल) २०२० को नवौं खेलमा आज राजस्थान रोयल्स र किंग्स इलेभेन पञ्जाब खेल्दै छन् । खेल नेपाली समय अनुसार बेलुका ७ : ४५ पछि शारजाह क्रिकेट स्टेडियममा सुरु हुनेछ ।

राजस्थान र पन्जाब लगातार दोस्रो जितको खोजिमा छन् । पहिलो खेलमा राजस्थानले चेन्नई सुपर किंग्सलाई १६ रनले पराजित गरेको थियो । पहिलो खेलमा दिल्लीसँग सुपर ओभरमा पराजित भएको पन्जाबले उत्कृष्ट पूनरागमन सहित रोयल च्यालेन्जर्स बेंगलोरलाई ९७ रनले हराएको गरेको थियो ।

पन्जाबले बेंगलोरबिरुद्ध र राजस्थानले चेन्नईविरुद्ध उत्कृष्ट ब्याटिङ गर्दै २ सय रनमाथिको योगफल कटाएका थिए । राजस्थानले चेन्नईविरुद्ध ७ विकेटको क्षतिमा २ सय १६ रनको विशाल योगफल बनाएको थियो । जसक्रममा ओपनर सन्जु स्यामसनले ७४ र कप्तान स्टिभ स्मिथले ६९ रनको उत्कृष्ट इनिङ खेलेका थिए ।

यी दुबै ब्याट्सम्यान राजस्थानका प्रमुख ब्याटिङ हतियार हुन् । राजस्थानको मध्यक्रम ब्याटिङ भने केहि कमजोर देखिएको थियो । पन्जाबबिरुद्ध राजस्थानका प्रमुख ब्याट्सम्यान जस बटलर उपलब्ध हुँदा थप मजबुत बन्ने छ । इंग्ल्यान्डका विकेटकिपर बटलर पछिल्लो समय उत्कृष्ट लयमा छन् । पन्जाबलाई बटलर घातक बन्न सक्छन् ।

ओपनिङ यशस्वी जैसवाल र बटलरले गर्ने छन् । पहिलो खेलमा ६ रनमा आउट भएका जैसवाल पन्जाबविरुद्ध भने ठूलो इनिङ खेल्न सक्छन् । बटलर टोलीमा उपलब्ध हुँदा डेभिड मिलर बेन्चमा बस्ने छन् । पहिलो खेलमा मिलर शून्यमा आउट भएका थिए । पहिलो खेलमा ४ ओभरमा ५४ रन खर्चेर १ विकेट लिएका अलराउन्डर टम करनको स्थानमा वेस्टइन्डिजका तीव्र गतिका बलर ओशान थोमसले मौका पाउन सक्छन् ।

यता बेंगलोरविरुद्ध १ सय ३२ रनको उत्कृष्ट इनिङ खेलेका कप्तान लोकेश राहुल पन्जाबका प्रमुख हतियार हुन् । पन्जाबले बेंगलोरबिरुद्ध तीन विकेटको क्षतिमा २ सय ६ रन बनाएको थियो । सुरुवाती दुई खेलमा बेन्चमा बसेका वेस्टइन्डिजका आक्रामक ब्याट्सम्यान क्रिस गेलले राजस्थानबिरुद्ध खेल्ने सम्भावना छ ।

मध्यक्रमका ब्याट्सम्यान निकोलस पूरन पहिलो खेलमा शून्यमा आउट हुँदा दोस्रो खेलमा १८ बलमा १७ रनमा आउट भएका थिए । पुरनलाई बेन्चमा राखेर गेललाई मौका दिने सम्भावना देखिन्छ । दुवै खेलमा खराब प्रर्दशन गरेका ग्लेन म्याक्सवेललाई उत्कृष्ट इनिङ खेल्न आवश्यक र दबाब छ ।

बेंगलोरबिरुद्ध समान तीन विकेट लिदै विशाल जित दिलाएका स्पिनर रबि बिश्रोई र मुरुगन आश्विनको जोडीलाई राजस्थानबिरुद्ध निरन्तरता दिने छ । शेल्डन कटरेल र मोहम्मद शामी दुबै तीव्र गतिका बलिङ हतियार हुन् ।

आइपिएलमा यी दुई टोलीबीच कुल १९ खेल भएको छ । जसमा राजस्थान १० खेलमा विजयी हुँदा ९ खेलमा पराजित भएको थियो ।