एजेन्सी – किंग्स इलेभेन पन्जाबका कप्तान तथा ओपनर लोकेश राहुलले इन्डियन प्रिमियर लिग (आइपिएल) मा कीर्तिमान बनाएका छन् ।

बिहीबार राती दुबई इन्टरनेशनल क्रिकेट मैदानमा रोयल च्यालेन्जर्स बेंगलोरबिरुद्ध उत्कृष्ट शतक प्रहार गर्ने क्रममा राहुलको नाममा कीर्तिमान बनेको हो । राहुल बेंगलोरविरुद्ध ६९ बलमा १४ चौका र ७ छक्का सहित १ सय ३२ रनमा अविजित रहे । योसँगै राहुल आइपिएल इतिहासमा कप्तानको रुपमा एकै इनिङमा सर्वाधिक रन बनाउने खेलाडी बनेका छन् ।

राहुलले सनराइर्जस हैदराबादका कप्तान डेभिड वार्नरलाई पछि पारेका हुन् । यसअघि कप्तानको रुपमा वार्नरले सन् २०१७ मा कोलकाता नाइट राइडर्सविरुद्ध ५९ बलमा १ सय २६ रनको इनिङ खेलेका थिए । आइपिएल इतिहासमा राहुलको यो सर्वाधिक चौथो ठूलो व्यक्तिगत इनिङ हो ।

आइपिएलमा एकै इनिङमा सर्वाधिक रन जोड्ने कीर्तिमान क्रिस गेलको नाममा छ । गेलले सन् २०१३ मा रोयल च्यालेन्जर्स बेंगलोरबाट पूणे वारियर्सविरुद्ध ६६ बलमा १ सय ७५ रनको अविजित इनिङ खेलेका थिए । कोलकाता नाइट राइडर्सबाट ब्रेन्डम म्याकुलमले सन् २००८ मा बेंगलोरविरुद्ध ७३ बलमा १ सय ५८ रनको अविजित इनिङ खेलेका थिए । गेलले विराट कोहली र म्याकुलले सौरभ गांगुलीको कप्तानीमा उक्त इनिङ खेलेका थिए ।

सन् २०१५ मा बेंगलोरबाट एबी डि भिलियर्सले मुम्बई इन्डियन्सविरुद्ध १ सय ३३ रनको अविजित इनिङ खेलेका थिए । डी भिलियर्सले कोहलीको कप्तानीमा उक्त शतक प्रहार गरेका थिए । आइपिएल करिअरमा राहुलको यो दोस्रो शतक हो । राहुलले अघिल्लो वर्ष मुम्बईविरुद्ध शतक जोडेका थिए ।