एजेन्सी – इन्डियन प्रिमियर लिग (आइपिएल) २०२० को छैटौं खेलमा आज रोयल च्यालेन्जर्स बेंगलोर र किंग्स इलेभेन पन्जाबबीच प्रतिस्पर्धा हुँदै छ । खेल नेपाली समय अनुसार ७ : ४५ मा दुबई इन्टरनेशनल क्रिकेट स्टेडियममा सुरु हुने छ ।

विराट कोहली कप्तान रहेको बेंगलोर लगातार दोस्रो जित निकाल्ने सोचमा छ । बेंगलोरले पहिलो खेलमा हैदराबादलाई १० रनले पराजित गरेको थियो । लोकेश राहुल कप्तान रहेको पन्जाब पहिलो खेलमा सुपर ओभरमा दिल्लीसँग पराजित भएको थियो । बेंगलोरलाई पहिलो खेलमा जित दिलाउन स्पिनर युजभेन्द्र चहल, ओपनर देवदत्त पाडिक्कल र एबी डिभिलियर्सको भूमिका महत्वपूर्ण थियो ।

डेब्यु खेलमै ५६ रन बनाएका पाडिक्कल र अरोन फिन्चले पहिलो विकेटका लागि ९० रनको साझेदारी गर्दै राम्रो सुरुवात दिलाएका थिए । यी दुबै खेलाडी दोस्रो खेलमा पनि नायक बन्न सक्छन् । आक्रामक ब्याट्सम्यान डी भिलियर्सले ३० बलमा ५१ रनको योगदान दिएका थिए ।

बेंगलोरका प्रमुख ब्याटिङ हतियार डी भिलियर्सलाई पहिलो खेलमा जस्तै प्रर्दशनमा निरन्तरता दिन आवश्यक छ । कोहलीले १३ बलमा १४ रन जोडेका थिए । युवा विकेटकिपर जोश फिलिपेलाईनै बेंगलोरले दोस्रो खेलमा निरन्तरता दिन सक्छ । उमेश यादवले पहिलो खेलमा ४ ओभरमा ४८ रन खर्चिदा कुनै विकेट लिन सकेका थिएनन् । यादवलाई उत्कृष्ट प्रर्दशन गर्न आवश्यक छ । ४ ओभरमा १८ रन खर्चेर प्रमुख तीन विकेट लिदै जित दिलाएका स्पिनर युजभेन्द्र चहल बेंगलोरको प्रमुख बलिङ हतियार हुन् । पञ्जाबलाई पनि चहल घातक बन्न सक्छन् ।

पन्जाब पहिलो खेलमा दिल्लीसँग जित नजिक पुगेर पराजित भएको थियो । अन्तिम तीन बलमा एक रन बनाउन नसक्दा सुपर ओभरमा पुग्दै पराजित भएको पन्जाबले बेंगलोरविरुद्ध उक्त गल्तीबाट पाठ सिक्दै जित निकाल्न चाहान्छ । दिल्लीविरुद्ध मोहम्मद शामीले ३ विकेट लिदा मयंक अग्रवालले ६० बलमा ८९ रनको योगदान दिएका थिए । करुण नायर १, निकोलस पूरन शून्य, ग्लेन म्याक्सवेल १ र शरफराज खान १२ रनमा आउट भएका थिए । मध्यक्रम र तल्लोक्रमका यी चारै ब्याट्सम्यानलाई उत्कृष्ट प्रर्दशन गर्नु पर्ने दबाब छ ।

पहिलो पटक कप्तानी गरेका राहुलले दिल्लीविरुद्ध राम्रो प्रभाव छाडेका थिए । दिल्लीबिरुद्ध ४ ओभरमा ५६ रन खर्चेका तीव्र गतिका बलर क्रिस जोर्डनको स्थानमा पन्जाबले स्पिनर मुजिब उर रहमानलाई मौका दिन सक्ने बढी सम्भावना छ । रहमानले सिपिएलमा उत्कृष्ट प्रर्दशन गरेर आएका छन् । आइपिएलमा पञ्जाब र बेंगलोरबीच कुल २४ खेल भएका छन् । जसमा पञ्जाबले १२ खेलमा जित्दा १२ खेलमा हारेको छ ।