काठमाडौं – एनआइसी एसिया बैंकले राष्ट्रिय टोली सदस्य समेत रहेका यू–१९ क्रिकेट कप्तान राजु रिजाल र प्रेम तामाङलाई दुई बर्षका लागि प्रायोजन गरेको छ ।

दुई खेलाडी र बैंकका प्रमुख कार्यकारी अधिकृत लक्ष्मण रिसालले बिहीबार थापाथली ट्रेड टावरमा रहेको मुख्य कार्यालयमा बिहीबारसम्झौता पत्रमा हस्ताक्षर गरेका थिए । बैंकबाट राजु र प्रमेले दुई बर्षसम्म मासिक २० हजार रुपैयाँ प्राप्त गर्नेछन् ।

उनीहरुलाई बैंकले खेल सामाग्रीका पनि प्रायोजन गरेछ । नेपाल क्रिकेट खेलाडी संघको पहलमा खेलाडी र बैंकबीच सम्झौता भएको थियो । राष्ट्रिय क्रिकेट टोलीका कप्तान पारस खड्काले यो सुरुआतकै अर्को चरण भएकोब बताउँदै भने,‘आउने दिनमा कर्पोरेट हाउसहरुमा पनि अन्य खेलाडीका लागि सम्झौताको प्रयास गरिनेछ ।’ पारस खेलाडी संघका महासचिव हुन् ।

यसअघि संघकै पहलमा राष्ट्रिय टोलीका अर्का सदस्य सन्दीप लामिछानेलाई सानिमा बैंकले प्रायोजन गरेको थियो । पारसले क्रिकेट विकासका लागि खेलाडीको भविष्य सुनिश्चित हुने पर्ने बताए । राजु र प्रेमले बैंक र संघलाई धन्यवाद दिदै क्रिकेटमा अझै राम्रो गर्न प्रयास गर्ने बताए । बैंकका प्रमुख कार्यकारी अधिकृत रिसालले सम्झौतामा पारस र खेलाडी संघ भूमिका महत्वपूर्ण रहेको बताएका थिए ।

उनले खेलाडी संघले सुरुमा एकजनाको मात्र प्रस्ताव लिएर आएपनि क्रिकेटलाई सहयोग गर्नु पर्छ भनेर दुई जनालाई प्रायोजन गरेको बताए । उनले थपे,‘यो एक किसिमको खेलकुद छात्रबृति हो । यो कुनै पारिश्रमिक वा अनुदान होइन । उीनरुको खेलमा सहयोग पुगोस भन्नका लागि सानो प्रयास मात्र हो । यसले अरु कर्पोरेट हाउसहरु पनि आउन भन्ने हामी चाहन्छौं ।’