एजेन्सी – दक्षिण अफ्रिका पूर्व क्रिकेटर तथा फिल्डिंगका बादशाह जोन्टी रोड्स स्विडेन राष्ट्रिय क्रिकेट टोलीको मुख्य प्रशिक्षकमा नियुक्त भएका छन् ।

५१ वर्षिय जोन्टीले स्विडेन क्रिकेट टोली आगामी नोभेम्बर देखि सम्हाल्ने छन् । जुनियर तथा सिनियर क्रिकेट टोलीको तीव्र रुपमा क्रिकेट विकास गर्न स्विडेन क्रिकेटले जोन्टीलाई टोलीमा प्रशिक्षकको रुपमा नियुक्त गरेको हो । ‘म स्विडेन क्रिकेट टोलीसँग त्यहाँको समुदायसँग परिवारका साथ काम गर्न एकदमै उत्साहित छु । यो अवसर एक सही समयमा आएको छ’, रोड्सले भने ।

रोड्स हाल संयुक्त अरव इमिरेट्स (यूएई) मा किंग्स इलेभेन पञ्जावको फिल्डिङ प्रशिक्षकको रुपमा काम गरि रहेका छन् । रोड्सले आगमी नोभेम्बर देखि स्विडेन टोली सम्हाल्ने छन् । जोन्टी दुई पटक नेपाल आइसकेका छन् ।

जोन्टी तेस्रो संस्करणको धनगढी प्रिमियर लिग (डिपिएल) २०७५ मा गुडविल एम्बासडरको रुपमा रहेका थिए । जोन्टीले त्यसक्रममा सिवाईसी अत्तरिया टिम म्यानेजरको रुपमा समेत काम गरेका थिए । प्रतियोगिताको कागजी रुपमा कम्जोर सिवाईसी अत्तरियाले उपाधि जितेको थियो । त्यसै वर्ष जोन्टीले कात्तिकमा विशेष प्रशिक्षण दिन नेपाल आएका थिए ।

यता नेपाल क्रिकेट संघ (क्यान) ले मुख्य प्रशिक्षकको लागि खुल्ला आवहन गरेको छ । जोन्टी आउन सक्ने सम्भावनाको रुपमा समेत हेरिएको थियो । विश्व क्रिकेटकै सर्वोत्कृष्ट फिल्डिर रोड्सले दक्षिण अफ्रिकाबाट ५२ टेष्ट र २ सय ४५ ओडिआई खेलेका छन् ।

सन् १९९२ को एकदिवसीय बिश्वकपको दौरान पाकिस्तान क्रिकेटर इन्जमाम उल हकको रन आउटको कारण प्रख्यात रोड्सलाई त्यतिबेला एउटा पत्रिकाले ‘के यो चरा हो रु के यो जहाज हो ? हैन, यो जोन्टि हो’ लेखेको प्रसंग चर्चित मानिन्छ । हावामा उड्दै उनले गरेको रन आउट बिश्व क्रिकेटमा धेरै याद गरिने क्षण मध्येको एक हो । रोड्सले मुम्बई इन्डियन्स, श्रीलंका, दक्षिण अफ्रिका, केन्या लगायतका टिमको प्रशिक्षण सम्हालिसकेका छन् ।