एजेन्सी – क्यारेबियन प्रिमियर लिग (सिपिएल) को २५ औं खेलमा नेपाली लेग स्पिनर सन्दीप लामिछाने सम्मिलित जमैका तलावाजले सेन्ट किट्स एण्ड नेभिस प्याटियटसविरुद्ध खेल्दैछ ।

खेल नेपाली समय अनुसार आज साँझ ७: ४७ पछि ब्रायन लारा स्टेडियममा सुरु हुने छ । जमैकालाई सेमिफाइनल यात्रा बलियो बनाउन आजको खेल जित्नैपर्ने हुन्छ । यता सेन्ट किट्स आजको खेलमा पराजित भएमा लिग चरणबाट औपचारिक रुपमा बाहिरिने पहिलो टोली बन्ने छ । जमैका ७ खेलमा ३ मा जित र ४ मा हार सहित चौथो स्थानमा छ । सेन्ट किट्स ८ खेलमा ७ मा हार र १ मा जित सहित पुछारमा छ ।

जमैकालाई कम्जोर ब्याटिङ चिन्ताको विषय बनेको छ । जमैकाले चार मध्य तीन खेल कम्जोर ब्याटिङको कारण हारेको छ । जमैका ओपनर ग्लेन फिलिप्स र अलराउन्डर आन्द्रे रसेल बाहेक अन्यको प्रर्दशन राम्रो छैन । बलिङमा स्पिनर सन्दीप र मुजिब उर रहमानको जोडिले उच्च प्रर्दशन गर्दै आएका छन् ।

सन्दीपले ७ खेलमा १० विकेट लिएका छन् । मुजिब ७ खेलमा १३ विकेट लिएका छन् । तीव्र गतिका बलर कार्लोस ब्रेथवेट, ओशाने थोमस र फिडेल एडवार्ड्सलाई स्पिनरलाई राम्रो साथ दिन आवश्यक छ ।

यता सेन्ट किट्सले सेमिफाइनलको झिनो अंक गणितीय आशा बाँकी राख्न जित्नै पर्ने हुन्छ । यस पटक ओपनर क्रिस लिन र इभिन लुइसले अपेक्षा अनुसार प्रर्दशन गर्न सकि रहेका छैनन् । बलिङमा ईश सोधी र सोहेल तनवीर रहेका छन् । कप्तान रायद इम्रिट र शेल्डन कटरेल बलिङ हतियार हुन् । जोशुवा डा शिल्भा र बेन डंकबाट राम्रो ब्याटिङको आशा सेन्ट किट्सले राखेको छ । सिपिएलमा यी दुई टोलीबीच कुल १२ खेल भएका छन् । जसमा जमैका ६ खेलमा विजयी हुँदा ६ खेलमा पराजित भएको छ । यसै सिजनको पहिलो खेलमा जमैका ३७ रनले विजयी भएको थियो ।

सन्दीपलाई दोस्रो स्थानमा उक्लिने अवसर

सन्दीपलाई सर्वाधिक विकेट लिने बलरको सूचिमा दोस्रो स्थानमा उक्लिने अवसर छ । सन्दीपले आजको खेलमा दुई भन्दा बढि विकेट लिए दोस्रो स्थानमा उक्लिने छन् । मुजिब ७ खेलमा १३ विकेटका साथ शीर्ष स्थानमा छन् । सेन्ट लुसिया जुक्सका तीव्र गतिका बलर स्कट कुग्गलेइन र गुयाना एमेजन वारियर्सका स्पिनर इमरान ताहिर १२ विकेटका साथ दोस्रो स्थानमा छन् ।

स्कटले ८ र इमरानले ९ खेल खेलेका छन् । जुक्सका मोहम्मद नाबी र वारियर्सका नविन उल हकले समान ८ खेलमा ११ विकेटका साथ तेस्रो स्थानमा छन् । सन्दीपसँगै रायद इम्रित, केस्रिक विलियम्स र राशिद खान १० विकेटका साथ चौथो स्थानमा छन् ।

यस्तो छ अंक तालिका

अपराजित ट्रीनबेगो नाइट राइडर्स ८ खेलमा १६ अंकका साथ शीर्ष स्थानमा रहँदै सेमिफाइनलमा पुगि सकेको छ । गुयाना ९ खेलमा ५ मा जित र ४ मा हार सहित दोस्रो स्थानमा रहँदै सेमिफाइनल यात्रा पक्का गरेको छ । जुक्स ८ खेलमा ५ मा जित र ३ मा हार सहित तेस्रो स्थानमा छ । जुक्स पनि सेमिफाइनलमा पुगि सकेको छ ।

जमैका ७ खेलमा ४ मा हार र ३ मा जित सहित चौथो स्थानमा छ । बार्बाडोस ८ खेलमा २ मा जित र ६ मा हार सहित पाँचौ स्थानमा छ । सेन्ट किट्स ८ खेलमा ७ मा हार र १ मा जित सहित पुछारमा छ ।