एजेन्सी – क्यारेबियन प्रिमियर लिग (सिपिएल) को २१ औं खेलमा नेपाली लेग स्पिनर सन्दीप लामिछाने सम्मिलित जमैका तलावाजले अपराजित ट्रीनबेगो नाइट राइडर्सविरुद्ध खेल्दैछ ।

खेल नेपाली समय अनुसार आज साँझ ७ : ४५ पछि ब्रायन लारा स्टेडियममा सुरु हुने छ । सेमिफाइनलको यात्रा बलियो बनाउन जमैकालाई आजको खेल जित्नै पर्ने हुन्छ । यता नाइट राइडर्स जमैकालाई हराउँदै औपचारिक रुपमा सेमिफाइनलमा प्रवेश गर्न चाहन्छ । नाइट राइडर्स आफ्नो अपराजित यात्रा कायमै राख्ने चुनौतीका साथ मैदान प्रवेश गर्नेछ । यता जमैका राइडर्सलाई पहिलो हारको स्वाद चखाउन चाहन्छ ।

नाइट राइडर्सका कप्तान काइरान पोलार्डले यस अघिको खेलमा बार्बाडोसलाई २ विकेटले हराउन २८ बलमा ९ छक्का र २ चौका सहित ७२ रनको उत्कृष्ट इनिङ खेलेका थिए । पोलार्डलाई छोड्दा ड्वेन ब्राभो, ड्यारेन ब्राभो, सुनिल नारायण, सिकन्दर राजा र कोलिन मुनरो लगायतका आक्रामक ब्याट्सम्यान टोलीमा छन् ।

यता जमैकालाई कप्तान रोभमान पवेल र ओपनर चाडविक वाल्टनको खराब लय चिन्ताको विषय हो । ओपनर ग्लेन फिलिप्स भने राम्रो लयमा छन् । उनले फिलिप्सले सेन्ट किट्स एण्ड नेभिस प्याट्रियट्सविरुद्ध ७९ रनको उत्कृष्ट इनिङ खेलेका थिए । फिलिप्सले ६ खेलमा २ अर्ध शतक सहित २ सय ७ रन बनाउँदै शीर्ष स्थानमा छन् ।

जमैकाको सबैभन्दा बलियो हतियार लेग स्पिनर सन्दीप र मुजिब उर रहमानको जोडी हो । जमैकाको कमजोर पक्ष ब्याटिङ रहेको छ । मुजिब ६ खेलमा १३ विकेट लिदै शीर्ष स्थानमा छन् । सन्दीपले ६ खेलमा ९ विकेट लिएका छन् । यी दुई जोडीको प्रर्दशन जमैकालाई धेरै महत्वपूर्ण हुनेछ । ट्रीनबेगोविरुद्ध पहिलो खेलमा सन्दीपले ४ ओभरमा ३० रन खर्चेर १ विकेट लिएका थिए । मुजिबले ४ ओभरमा १३ रन खर्चेर १ विकेट लिएका थिए ।

पहिलो खेलमा नाइट राइडर्सले तलावाजलाई ७ विकेटले हराएको थियो । नाइट राइडर्स ६ खेलमा १२ अंकका साथ शीर्ष स्थानमा छ । यता जमैका ६ खेलमा ६ अंकका साथ चौथो स्थानमा छ ।

यी दुई टोली बीच सिपिएलमा कुल १७ खेल भएका छन् । जसमा जमैका ९ खेलमा विजयी हुँदा ८ खेलमा पराजित भएको छ । जमैकाले पछिल्लो चार खेलमा ट्रीनबेगोलाई हराउन सकेको छैन । जमैका पछिल्लो चार खेलमा क्रमश : ७ विकेट, ४१ रन, २२ रन र ४ विकेटले पराजित भएको छ ।