लन्डन (एजेन्स)– जोय रुट र कप्तान इयोन मोर्गानले अर्धशतक बनाएपछि इङ्ल्यान्डले दोस्रो एकदिवसिय क्रिकेटमा पाकिस्तानलाई ४ विकेटले हराउँदै पाँच खेलको श्रृखंलामा २–० को अग्रता लिएको छ ।
रुटले ८९ र मोर्गानले ६८ रन बनाएपछि २ सय ५२ रनको लक्ष्य पछ्याएको इङ्ल्यान्डले ४७.३ ओभरमा ६ विकेट गुमाएर २ सय ५५ रन बनाएको थियो । जसका कारण पाकिस्तानका सरफराज अहमदले खेलजीवनकै उत्कृष्ट १ सय ५ रन बनाएपछि त्यो छायाँमा परेको थियो ।

रुटले मोर्गानसँग १ सय १२ र बेन स्टोक्स (४२) सँग ५६ रनको साझेदारी गर्दै टोलीलाइई जितको बलियो आधार दिलाएका थिए । १ सय ८ बल खेलेका रुटले ५ चौका प्रहार गरे । ८० बल खेल्दै मोर्गानले ९ चौका हाने । स्टोक्सले मात्र ३० बलमा ६ चौका र १ छक्का प्हार गरेका थिए । मोइन अलिले २१ रन जोडे ।
पाकिस्तानका इमाद वसिमले २ तथा मोहम्मद आमिर, हसन अलि र वाहव रियाजले समान १ विकेट लिए ।
त्यसअघि अहमदले एक दिवसिय क्रिकेटमा दोस्रो शतक बनाएपछि पाकिस्तानले १ बलअघि अलआउट हुँदै २ सय ५१ रन बनाएको थियो । पाकिस्तानले पहिलो चार ओभरमा मात्र २ रन बनाएको थियो । अहमद बाहेक अहमद वासिमले (६३) बाबर अजम (३०), सोहेब मलिक (२८) ले मात्र दोहोरो आकडामा रन बनाउन सकेका थिए । इङ्ल्यान्डका क्रिस वाकेस र मार्क उडले समान ३ विकेट लिएका थिए । लियाम प्लुङकेटले २ तथा अदिल रसिदले १ विकेट लिए । तेस्रो एक दिवसिय मंगलबार हुनेछ ।