फ्लोरिडा (एजेन्सी)– वेस्ट इन्डिजविरुद्धको पहिलो ट्वान्टी–२० क्रिकेटमा जितका लागि भारतलाई अन्तिम बलमा २ रन बनाउनु पर्ने थियो । तर, ड्वान ब्राभोको बलमा मार्लोन सामुइल्सबाट कप्तान महेन्द्रसिंह धोनी क्याचआउट भएपछि रोमाञ्चक खेलमा भारत १ रनको झिनोअन्तरले पराजित भएको छ ।

अमेरिकामा दुई ट्वान्टी –२० क्रिकेट श्रृखंलाको पहिलो खेलको स्कोर झन्डै एक दिवसिय स्कोरको बनेको थियो । भारतले टस जितेर वेस्ट इन्डिजलाई पहिलो ब्याटिङको निमन्त्रणा दियो । मौकाको पूर्ण सदुपयोग गर्दै वेस्ट इन्डिजले २० ओभरमा ६ विकेट गुमाएर २ सय ४५ रन बनायो । जवाफमा लोकेश राहुलको शतकीय पारीका वावजुद भारतले ४ विकेटको क्षेतिमा २ सय ४४ रन जोड्यो ।
राहुल १ सय १० रनमा अविजित रहे भने कप्तान धोनी ४३ रनमा आउट भएका थिए । ओपनर रोहित शर्माले अर्धशतक बनाएपनि विराट कोहली १६ र अजिन्के रहानेले ७ रन बनाए । रोहितले २८ बलमा ४ छक्का र त्यत्तिनै छक्का प्रहार गरे । राहुलले ५१ बलमा १२ चौका र ५ छक्का प्रहार गरे । धोनीले २५ बल खेल्दै २ छक्का र त्यत्तिनै चौका बनाए । बाभ्रोले धोनीको महत्वपूर्णसहित २ विकेट लिए । आन्द्रे रसेल केरोन पोलार्डले समान १ विकेट लिए ।
त्यसअघि ओपनर जोन्सन चाल्र्स र इभिन लेविसको विस्फोटक ब्याटिङले वेस्ट इन्डिजलाई ठूलो स्कोरतर्फ अघि बढाएको थियो । लेविसले शतक र चाल्र्सले अर्ध शतक पुरा गरे । २० बलमा अर्धशतक बनाएका चाल्र्सले ७ छक्का र ६ चौकामा ७९ रन बनाए । चाल्र्ससँग पहिलो विकेटका लागि १ सय २६ रनको साझेदारी गरेका लेविसले ४९ बलमा ९ छक्का र ५ चौकाका साथ १ सय रन बनाए । रसेल र पोलार्डले समान १३ र कार्लोस बर्थवेटीले १४ रन बनाए ।
भारतका जसप्रित बुमराह र रविन्द्र जडेजाले समान २ विकेट तथा मोहम्मद सामीले १ विकेट लिए । दोस्रो खेल आइतबार हुनेछ ।