एजेन्सी – क्यारेबियन प्रिमियर लिग (सिपिएल) को आठौं खेलमा नेपाली लेग स्पिनर सन्दीप लामिछाने सम्मिलित जमैका तलावाजले गुयाना एमेजन वारियर्सविरुद्ध खेल्दैछ ।

खेल नेपाली समय अनुसार शनिबार मध्यरात १२ बजेपछि ब्रायन लारा स्टेडियममा सुरु हुने छ । दुवै टोलीले सुरुवाती २ खेलमा समान १ मा जित र हार बेहोरेका छन् । गुयाना पहिलो खेलमा ट्रीनबेगो नाइट राइडर्ससँग ४ विकेटले पराजित हुँदा दोस्रो खेलमा सेन्ट किट्स एण्ड नेभिस पेट्रीयट्र्स लाई ३ विकेटले हराएको थियो । यता जमैकाले पहिलो खेलमा सेन्ट लुसिया जुक्सलाई ५ विकेटले हराएपनि राइडर्ससँग ७ विकेटले पराजित भएको थियो ।

गुयानाका युवा ब्याट्सम्यान शिम्रन हेटमायर राम्रो लयमा छन् । हेटमायरले राइडर्सविरुद्ध ६३ र सेन्ट किट्सविरुद्ध ७१ रनको अर्ध शतकीय इनिङ खेलेका थिए । हेटमायरलाई छोड्दा ब्रान्डम किंग, निकोलस पूरन र रस टेलर जस्ता स्टार ब्याट्सम्यान गुयानामा छन् । स्पिनर इमरान ताहिर पनि गुयनाका प्रमुख हतियार हुन् ।

सन्दीप सम्मिलित जमैकाले दोस्रो खेलमा ब्याटिङमा कमजोर प्रर्दशन गरेको थियो । ओपनर ग्लेन फिलिप्सले राइडर्सविरुद्ध ५८ र सेन्ट लुसियाविरुद्ध ४४ रन जोडेका थिए । पहिलो खेलमा आसिफ अलीले लुसियाविरुद्ध ४७ रन बनाएका थिए । ओपनर चाडविक वाल्टन पहिलो खेलमा २ र दोस्रो खेलमा शून्यमा आउट भएका थिए । वाल्टनलाई ठूलो इनिङ खेल्न आवश्यक छ ।

अर्कोतर्फ आन्द्रे रसेलबाट पनि सोचे अनुसार प्रर्दशन हुन सकेको छैन । रसेल पहिलो खेलमा १६ र दोस्रो खेलमा २५ रनमा आउट भएका थिए । रसेलले तल्लोक्रममा आक्रामक ब्याटिङ गर्न आवश्यक देखिन्छ ।

सन्दीपले दुई खेलमा दुई विकेट लिएका छन् । पहिलो खेलमा लुसियाविरुद्ध ४ ओभरमा २३ रन खर्चेर १ विकेट लिएका थिए । राइडर्सविरुद्ध ४ ओभरमा ३० रन खर्चेर १ विकेट लिएका थिए । सन्दीपबाट उत्कृष्ट प्रर्दशनको आशा गरिएको छ ।

हेड टु हेडमा जमैका भन्दा गुयाना अघि छ । यी दुई टोलीले सिपिएलमा कुल १९ खेल खेलेका छन् । गुयानाले ११ खेलमा जित्दा ७ खेलमा पराजित भएको छ । एउटा खेल वर्षाको कारण रद्ध भएको थियो । गतवर्ष दुबै खेलमा गुयाना विजयी भएको थियो ।