एजेन्सी – युवा ब्याट्सम्यान ज्याक क्रलीले उत्कृष्ट शतक प्रहार गरेपछि पाकिस्तानविरुद्ध तेस्रो तथा अन्तिम टेष्ट खेलमा इंग्ल्यान्डले बलियो योगफल बनाएको छ ।

साउथह्याप्टनमा टस जितेर ब्याटिङ रोजेको इंग्ल्यान्डले पहिलो दिनको समाप्तिमा ९० ओभरमा ४ विकेटको क्षतिमा ३ सय ३२ रन बनाएको छ । इंग्ल्यान्डका २२ वर्षिय युवा ब्याट्सम्यान ज्याक क्रली २ सय ६९ बलमा १९ चौका सहित १ सय ७१ रनमा अविजित छन् । उनको यो टेष्ट करिअरको पहिलो शतक हो । क्रलीलाई विकेटकिपर जस बटलरले राम्रो साथ दिएका छन् । बटलर १ सय ४८ बलमा ९ चौका र २ छक्का सहित ८७ रनमा अविजित छन् ।

पछिल्लो समय ठूलो इनिङ खेल्न नसकेको भन्दै आलोचित बटलरले आफ्नो टेष्ट करिअरको दोस्रो शतक पूरा गर्न १३ रन बाँकी छ । क्रली र बटलरले पाँचौ विकेटका लागि पहिलो दिन ३ सय ९ बलमा २ सय ५ रनको दोहोरो शतकीय अविजित साझेदारी गरेपछि इंग्ल्यान्ड विशाल योगफलतर्फ बढेको छ ।

इंग्ल्यान्डको सुरुवात भने राम्रो हुन सकेन । पाँचौ ओभरको तेस्रो बलमा शाहिन अफ्रिदीले रोरी बन्र्सलाई ६ रनमा शान मसूदबाट क्याच आउट गराए । अर्का ओपनर डोम सिब्लेलाई यासिर शाहले २२ रनमा एलबिडब्लू आउट गरे । कप्तान जो रुटलाई नसिम शाहले २९ रनमा विकेटकिपर मोहम्मद रिजवानको हातबाट क्याच गराए । रुटले ५१ बलमा ३ चौका प्रहार गरे ।

ओली पोपलाई यासिर शाहले ३ रनमा बोल्ड आउट गर्दा इंग्ल्यान्ड ३९ ओभरमा १२७–४ को कम्जोर अवस्थामा पुगेको थियो । पाकिस्तानका यासिर शाहले २, शाहिन अफ्रिदी र नसिम शाहले १–१ विकेट लिए ।

पहिलो टेष्टमा इंग्ल्यान्ड तीन विकेटले विजयी हुँदा दोस्रो टेष्ट बराबरीमा सकिएको थियो । इंग्ल्यान्ड १० वर्षपछि पाकिस्तानविरुद्ध टेष्ट सिरिज जित्ने सोचमा छ । पाकिस्तान भने अन्तिम खेल जित्दै सिरिज बराबरीमा सकाउन चाहन्छ ।