एजेन्सी – युवा ब्याट्सम्यान शिम्रन हेटमायर र किमो पलको उत्कृष्ट प्रर्दशनमा क्यारेबियन प्रिमियर लिग (सिपिएल) को चौथो खेलमा गुयाना एमेजन वारियर्सले सेन्ट किट्स एण्ड नेभिस पेट्रीयट्सलाई ३ विकेटले पराजित गरेको छ ।

बिहिबार बिहान सम्पन्न खेलमा १ सय २८ रनको विजयी लक्ष्य गुयानाले १७ ओभरमा ७ विकेटको क्षतिमा पुरा गर्यो । गुयानाका युवा ब्याट्सम्यान हेटमायरले ४४ बलमा ८ चौका र ३ छक्का सहित ७१ रनको विजयी इनिङ खेले । यो उनको लगातार दोस्रो अर्धशतक हो । पहिलो खेलमा उनले ट्रीनबगो नाइट राइडर्सविरुद्ध ६३ रनको अविजित उत्कृष्ट अर्ध शतक प्रहार गरेका थिए ।

चन्द्रपल हेमराज १९, ब्रान्डम किंग र शेरफन रदरफोर्डले १०–१० रन जोडे । सेन्ट किट्सका रायद इम्रिटले ३ ओभरमा ३१ रन खर्चेर ३ विकेट लिए ।

त्यसअघि ब्रायन लारा स्टेडियममा टस हारेर ब्याटिङको निम्तो पाएको सेन्ट किट्सले निर्धारित २० ओभरमा ८ विकेटको क्षतिमा १ सय २७ रन बनाएको थियो । उसका इभिन लुईसले १८ बलमा ४ चौका र २ छक्का सहित सर्वाधिक ३० रनको योगदान दिए । क्रिस लिन १६, बेन डंक २९ र इम्रिटले १७ रन बनाए । किमो पलले ४ ओभरमा १९ रन खर्चेर ४ विकेट लिदै ‘प्लेयर अफ द म्याच’ चुनिए । इमरान ताहिरले २ र क्रिस ग्रिनले १ विकेट लिए ।

पहिलो खेलमा गुयाना ट्रीनबगो नाइट राइडर्ससँग ४ विकेटले पराजित भएको थियो । गुयानाले आफ्नो तेस्रो खेल शनिबार जमैका तलावाजसँग खेल्ने छ । सेन्ट किट्स पहिलो खेलमा बार्बाडोस ट्राइडेन्ट्ससँग ६ रनले पराजित भएको थियो । तेस्रो खेल शनिवार सेन्ट लुसिया जुक्सविरुद्ध खेल्ने छ ।