एजेन्सी– इंग्ल्यान्ड क्रिकेट बोर्डले अष्ट्रेलियासँग हुने ओडिआई र टि२० आई सिरिजको मिति सार्वजनिक गरेको छ । इंग्ल्यान्डले अष्ट्रेलियासँग सेप्टेम्बर ४ देखि १६ सम्म समान तीन ओडिआई र टि२० आई सिरिज खेल्ने शुक्रबार जनाएको छ । हाल इंग्ल्यान्डले पाकिस्तानसँग तीन टेष्ट सिरिज अन्तर्गत दोस्रो खेल खेलि रहेको छ ।

अष्ट्रेलिया क्रिकेट टोलीले आगामी अगष्ट २४ मा इंग्ल्यान्ड भ्रमण गर्नेछ । तीन खेलको टि२० सिरिज साउथह्याप्टनमा हुने छन् । पहिलो टि२० खेल ४ सेप्टेम्बर, दोस्रो ६ र तेस्रो तथा अन्तिम खेल ८ सेप्टेम्बरमा हुनेछ । तीनै ओडिआई खेल ओल्ड ट्राफर्ड म्यानचेस्टरमा हुनेछन् । ओडिआई खेललाई आइसिसी विश्वकप सुपर लिगको मान्यता दिएको छ । पहिलो ओडिआई खेल ११ सेप्टेम्बरमा हुने छ । दोस्रो १३ र तेस्रो तथा अन्तिम १६ सेप्टेम्बरमा हुने छ ।

इंग्ल्यान्डले अष्ट्रेलियासँग सिरिज खेल्नुअघि पाकिस्तानविरुद्ध तीन टि२०आई सिरिज खेल्ने छ । दोस्रो टेष्ट १७ अगष्टमा सकिने छ । तेस्रो तथा अन्तिम टेष्ट २१ अगष्ट देखि सुरु हुने छ । इंग्ल्यान्ड र पाकिस्तानबीचको टि२० सिरिजका तीनै खेल म्यानचेस्टरमा हुने छन् । पहिलो टि२० खेल अगष्ट २८ मा हुने छ । दोस्रो अगष्ट ३० र तेस्रो तथा अन्तिम सेप्टेम्बर १ मा हुने कार्यतालिका छ ।

यसअघि इंग्ल्यान्डले जुलाई ८ देखि २८ सम्म वेस्टइन्डिजसँग तीन टेष्ट सिरिज खेल्दै अन्तर्राष्ट्रिय क्रिकेट फर्काएको थियो । उक्त टेष्ट सिरिज इंग्ल्यान्डले २-१ ले जितेको थियो । इंग्ल्यान्डले ३० जुलाई देखि ४ अगष्ट आयरल्यान्डसँग तीन ओडिआई सिरिज खेलेको थियो । उक्त सिरिज इंग्ल्यान्डले २–१ ले जितेको थियो । ब्यस्त रहेको इंग्ल्यान्डले टेष्ट र ओडिआईको लागि फरक टोली घोषणा गरेको थियो ।