एजेन्सी – इंग्ल्यान्डका स्टार अलराउन्डर तथा उप-कप्तान बेन स्टोक्सले पाकिस्तानविरुद्ध तीन टेष्ट सिरिज अन्तर्गत बाँकी दुई खेल गुमाउने भएका छन् । पहिलो टेष्ट खेलमा शनिवार इंग्ल्यान्ड तीन विकेटले विजयी भएको थियो ।

स्टोक्सले पारिवारीक कारण टेष्ट सिरिज गुमाउने भएको इंग्ल्यान्ड क्रिकेट बोर्डले जनाएको छ । स्टोक्स यसै साता आफ्नो जन्मथलो न्युजिल्यान्ड जाने छन् । न्युजिल्यान्डका स्टोक्सका बाबु आमा बस्ने गर्दछन् । स्टोक्स नहुँदा इंग्ल्यान्डको टोलीलाई ठूलो घाटा लाग्ने र सन्तुलनमा असर पर्ने देखिन्छ । स्टोक्सको स्थानमा इंग्ल्यान्डले युवा अलराउन्डर साम करनलाई मौका दिने सम्भावना रहन्छ ।

दोस्रो टेष्ट अगष्ट १३ देखि साउथह्याप्टनमा सुरु हुने छ । तेस्रो तथा अन्तिम टेष्ट २१ अगष्ट देखि साउथह्याप्टनमा सुरु हुने छ । यस अघि वेस्टइन्डिजविरुद्ध तीन टेष्ट सिरिज २–१ ले जिताउन स्टोक्स नायक बनेका थिए । पाकिस्तानविरुद्ध पहिलो खेलमा भने स्टोक्स चल्न सकेनन् । पहिलो इनिङमा शून्यमा आउट हुँदा दोस्रो इनिङमा ९ रन बनाउनुको साथै २ विकेट लिएका थिए ।

पाकिस्तानसँग इंग्ल्यान्डले तीन टि२० आई सिरिज पनि खेल्ने छ । त्यसको लागि इंग्ल्यान्डले सीमित ओभरको फरक टोली घोषणा गर्न सक्ने अनुमान गरिएको छ । आयरल्यान्डविरुद्ध तीन ओडिआई सिरिजमा इंग्ल्यान्डले वेस्टइन्डिजविरुद्ध टेष्ट सिरिजका खेलाडीलाई नसमेटी फरक टोली घोषणा गरेको थियो ।