काठमाडौं (हाम्रो खेलकुद) – अफगानिस्तानका स्टार स्पिनर मुजिब उर रहमानले क्यारेबियन प्रिमियर लिग (सिपिएल) मा सन्दीप लामिछाने सम्मिलित जमैका तलावाजबाट खेल्ने भएका छन् ।

दक्षिण अफ्रिका स्पिनर तरबेज शाम्सी कोरोना महामारीको कारण उडान प्रतिबन्धको कारण सिपिएल खेल्न नसक्ने भएपछि मुजिबले जमैकाबाट खेल्ने भएका हुन् । १९ वर्षिय मुजिब विश्वस्तरिय स्पिनर हुन् । मुजिबले अफगानिस्तान र विश्वका चर्चित फ्रेन्चाइज लिगमा उच्च प्रर्दशन गर्दै आएका छन् । मुजिबको आगमनले जमैकाको बलिङ झनै मजबुत बन्ने छ ।

सिपिएल भदौ २ देखि २५ सम्म ट्रीनिडाड एण्ड टोबेगोमा हुँदै छ । सिपिएल खेल्न सन्दीप एक हप्ता अघि त्यसतर्फ लागिसकेका छन् । सन्दीपलाई अक्सनमा जमैकाले एक करोड भन्दा बढि मूल्यमा अनुबन्ध गरेको थियो । जमैकाले सिपिलएलमा दुई पटक उपाधि जितेको छ । सन् २०१३ को पहिलो संस्करण र २०१६ मा उपाधि जितेको थियो ।

दुवै पटक फाइनलमा जमैकाले गुयाना एमेजन वारियर्सलाई हराएको थियो । जमैकामा आन्द्रे रसेल, कार्लोस ब्रेथवेट, ओशन थोमस जस्ता स्टार खेलाडी छन् । सिपिएलमा दुइ सेमिफाइनल र एक फाइनल गरि कुल ३३ खेल हुने छन् । सबै खेल समर्थक विनाको रंगशालामा हुने छ ।

जमैकाले अगष्ट १९ मा सेन्ट लुसिया जुक्सविरुद्ध खेल्दै सुरुवात गर्ने छ । २० अगष्टमा जमैकाले ट्रीनबेगो नाइट राइडर्सविरुद्ध खेल्ने छ । २२ अगष्टमा गुयाना एमेजन वारियर्सविरुद्ध खेल्ने छ । २५ अगष्टमा पुन गुयानासँग खेल्ने छ । २६ अगष्टमा बार्बाडोस ट्राइडेन्ट्सविरुद्ध खेल्ने छ । २९ अगष्टमा सेन्ट किट्स एण्ड नेभिस पेट्रीयट्सविरुद्ध खेल्ने छ ।

१ सेप्टेम्बरमा ट्राइडेन्ट्सविरुद्ध खेल्ने छ । ३ सेप्टेम्बरमा पेट्रीयट्सविरुद्ध खेल्ने छ । सेप्टेम्बर ५ मा बार्बाडोसविरुद्ध खेल्ने छ । लिग चरणको अन्तिम खेलमा लुसिया जुक्सविरुद्ध खेल्ने छ । शीर्ष चारमा पर्न सकेमा सेप्टेम्बर ८ मा सेमिफाइनल खेल खेल्ने छ । फाइनल १० सेप्टेम्बरम हुँने छ ।