काठमाडौं (हाम्रो खेलकुद) – नेपाल क्रिकेट संघ (क्यान) ले जिल्ला र प्रदेशलाई हालसम्मकै सर्वाधिक बजेट उपलब्ध गराएको छ । क्यानले आइतबार आफ्ना ३९ मध्य २९ जिल्ला र ६ प्रदेशलाई तोकिएको रकम पठाएको हो ।

प्रत्येक जिल्लालाई ५० हजार र प्रदेशलाई १ लाखका दरले रकम पठाएको जनाएको छ । क्यानले इतिहासमा पहिलो पटक जिल्लालाई ५० हजार रुपैयाँ पठाएको हो । ‘हाम्रो प्रमुख लक्ष्य भनेको ग्रासरुट हो । बाँकी १० जिल्लाको खाता नम्बर आएको छैन र त्यसैले नपठाएका हौं । खाता नम्बर आउँदा बितिक्कै ती बाँकी जिल्लालाई पनि पठाउन छौं,’ क्यानका कोषाध्यक्ष रोशनकुमार सिंहले हाम्रो खेलकुदसँग भने ।

‘क्यानले पहिला जिल्लालाई प्रतियोगिता गर्न १० हजार रुपैयाँ मात्र दिने गर्थ्यो । क्यानलाई ग्रासरुटको पिडा र दुःख राम्रोसँग थाहा छ । त्यसैले हामीले कार्यालय सञ्चालन र प्रतियोगिताको लागि जिल्लालाई १ लाख र प्रदेशलाई ३ लाख दिने निर्णय गरेका थियौं । तर अहिले हामीले एक लाख भनेको ठाउँमा यो आर्थिक बजेटको हिसाबको कारण ५० हजार पठाएका हौं । त्यहिँ कारण प्रदेशलाई १ लाख पठाएका हौं । आगामी वर्षदेखि प्रदेशलाई तीन र जिल्लालाई एक लाखका दरले पठाउने छौं’, सिंहले भने ।

क्रिकेट संरचनामा कर्णाली प्रदेश पाँचमै गाभिएको छ । कर्णाली प्रदेशमा सुर्खेत मात्र क्रिकेट खेल्ने जिल्ला हो । क्रिकेट विकासका लागि क्यानले राष्ट्रिय र घरेलु सबै प्रतियोगितामा कर्णालीलाई खेल्न दिदै आएको छ । कर्णालीको कप्तानी युवा ब्याट्सम्यान रविन्द्र शाहीले गर्ने गर्दछन् । क्यानको संरचानामा भने कर्णाली प्रदेश पाँचसँग मिलेको छ ।