एजेन्सी – इन्डियन प्रिमियर लिग (आइपिएल) १३ औं संस्करण असोज पहिलो साता देखि संयुक्त अरब इमिरेट्स (यूएई) मा सुरु हुने भएको छ ।

आइतबार बसेको आइपिएल गभर्निङ काउन्सिलले यस संस्करणको आइपिएल असोज ३ देखि कात्तिक २५ (सेप्टेम्बर १९ देखि नोभेम्बर १०) सम्म गर्ने औपचारिक निर्णय गरेको छ । आइपिएलका खेल दुबई, आवूधावी र शारजाहमा हुनेछन् । कोरोना महामारीपछि हुन लागेको विश्वकै सर्वाधिक ठूलो र लोकप्रिय टि२० लिगमा फ्रेन्चाइज टोलीले २४ खेलाडी मात्र राख्न पाउने छन् ।

कोरोना महामारीको कारण खेलाडी संख्या बढाउन सक्ने अनुमान गरिएको थियो । खेलको क्रममा कुनै खेलाडीलाई कोरोना देखिएमा टोलीले २४ खेलाडी मध्य जुनसुकै खेलाडीलाई उक्त स्थानमा खेलाउन पाउने छन् ।

आइपिएल ५३ दिन सम्म चल्नेछ । जुन अन्तिम दुई संस्करण भन्दा दुई दिन बढि हो । दश दिन दुई खेल हुने छन् । आइपिएलमा ८ टोलीले डबल राउन्ड रोविनको आधारमा प्रतिस्पर्धा गर्ने छन् । लिग चरणका ५६ खेल हुँदा क्वालिफायर, एलिमिनेटर, दोस्रो क्वालिफायर र फाइनल गरि कुल ६० खेल हुनेछ । सबै खेल नेपाली समय अनुसार बेलुका ७:१५ मा सुरु हुनेछ । दिनमा दुई खेल भएको समयमा दिउँसो ३ः१५ देखि सुरु हुनेछ । आइपिएलको फाइनल पहिलो पटक मंगलबार हुनेछ ।

आइपिएलले आफ्नो प्रमुख प्रायोजकमा चिनियाँ मोबाइल फोन कम्पनी भिभोलाईनै निरन्तरता दिने निर्णय गरेको छ । गत असारमा लद्दाखमा भारतीय २० सैनिकको चिनियाँ सैनिकको आक्रमणमा परि मृत्यु भएपछि भिभोलाई हटाउनु पर्ने माग उठेको थियो ।

आइपिएल देश बाहिर तेस्रो पटक हुन लागेको हो । यसअघि सन् २००९ मा आम निर्वाचनको कारण पूरै संस्करण दक्षिण अफ्रिकामा भएको थियो । सन् २०१४ मा आमनिर्वाचनको कारण यूएईमा आइपिएलका २० खेल भएका थिए । यूएईमा सोमबार सम्म ६० हजार ९ सय ९९ जनामा देखिदा ५४ हजार ६ सय १५ जना ठिक भएका छन् । ३ सय ५१ जनाको मृत्यु भएको छ ।