काठमाडौं (हाम्रो खेलकुद) – नेपाली क्रिकेट टोलीका लेग स्पिनर सन्दीप लामिछानेले टीयु क्रिकेट मैदानमा कार्यरत कर्मचारीलाई १ लाख रुपैयाँ सहयोग गर्ने भएका छन् ।

सन्दीपले क्यारेबियन प्रिमियर लिग (सिपिएल) खेल बिहिबार जानुअघि बुधबार पत्रकार सम्मेलनको क्रममा एक लाख रुपैयाँ सहयोग घोषणा गरेका हुन् ।

‘हामी आउँदा सधैं पिच र मैदान तयार पार्नुहुन्छ । कोरोनाले प्रभावित भएको बेला उहाँहरुलाई धेरै कठिन भएको होला । सहयोग गर्न ढिला पनि भएको होला । अन्य दिनमा सहयोगी हातहरु थपिँदै जालान् । मैले आफ्नो तर्फबाट सक्ने सहयोग गर्न चाहन्छु’, सन्दीपले भने । नेपालको एकमात्र अन्तर्राष्ट्रिय क्रिकेट मैदान टीयुमा कुल १५ जना कर्मचारी रहेका छन् ।

सिपिएल भदौ २ देखि २५ (अगष्ट १८– सेप्टेम्बर १०) सम्म ट्रीनिडाड एन्ड टोबेगोमा हुँदैछ । सन्दीप बिहिबार १० बजे विहान कोरियन एरलायन्सको चार्टर्ड उडानबाट अमेरिका हुँदै शनिबार सम्म वेस्टइन्डिजको सिपिएल आयोजना हुने स्थानमा पुगिसक्ने छन् । सन्दीप १४ दिन क्वारेन्टाइनमा बस्ने छन् ।

मंगलबार कोरोना परिक्षण गराएका सन्दीपको रिपोर्ट नेगेटिभ आएसँगै उनी जाने भएका हुन् । गत असारमा भएको ड्राफ्टमा सन्दीपलाई जमैका तलावाजले एक करोड नेपाली रुपैयाँ भन्दा बढी मूल्यमा अनुबन्ध गरेको थियो । सन्दीपको टोली जमैकामा आन्द्रे रसेल, कार्लोस ब्रेथवेट, तब्रेज शाम्सी र ओशन थोमस जस्ता स्टार खेलाडी छन् ।