भुपेन्द्र जिसी, काठमाडौं

घरेलु टोलीविरुद्ध शतक प्रहार गरेपछि सामान्यतया ब्याट्सम्यानले उक्त शतकको खुसीयाली मनाउन ब्याट उठाएर आफ्नो ड्रेसीङ रुमतर्फ संकेत गर्छन् । तर ओमानी अलराउन्डर अकिब इलियास गत माघमा भएको त्रिकोणात्मक सिरिजमा नेपाली समर्थकबाट यति प्रभावित भए, उनले आफ्नो सम्पूर्ण सफलता आफ्नो टोलीभन्दा पहिला नेपाली समर्थकसँग साटे । सिरिजभर नेपाली समर्थक उनको खेलबाट प्रभावित भए नै, उनी पनि नेपाली समर्थकको खेलप्रतिको लगाव र समर्थनले गर्दा उनीहरुकै फ्यान बन्न पुगे ।

गत माघमा ओमानले नेपालमा भएको आइसिसी विश्वकप लिग–२ त्रिकोणात्मक सिरिजमा शत प्रतिशत जित निकालेको थियो । यस सिरिजको नतिजाले ओमान विश्वकप लिग–२ को अंक तालिकामा शीर्षस्थानमा उक्लन सफल भयो । त्रिकोणात्मक सिरिजमा कीर्तिपुर मैदानमा युवा अलराउन्डर अकीब इलियासले ब्याटिङ र बलिङ दुवै पक्षमा जादुमयी प्रर्दशन गरेका थिए ।

सिरिजका ४ खेलमा उनले २ शतक सहित ३ सय २ रन बनाउनुको साथै १० विकेट लिए । पाकिस्तानी मूलका अकीबले सन् २०१५ देखि ओमानबाट खेल्दै आएका छन् । शीर्षक्रमका ब्याट्सम्यान तथा पार्टटाइम स्पिनर अकीब ओमानका प्रमुख खेलाडी हुन् ।

त्रिकोणात्मक सिरिजको पहिलो खेलमा नेपालविरुद्ध अकीबले १ विकेट लिनुको साथै १६ रनमा आउट भएका थिए । दोस्रो खेलमा नेपालले ओमानलाई २ सय ५० रनको लक्ष्य दिएपनि पराजित हुन पुगेको थियो । उक्त लक्ष्य ओमानले मात्र २ विकेटको क्षतिमा १६ बल अगाडीनै पुरा गरेको थियो । त्यो सहज जित दिलाउन अकीब नायक बनेका थिए ।

बलिङमा १० ओभरमा मात्र ३६ रन खर्चेर ४ विकेट लिएका उनले ब्याटिङमा अविजित १ सय ९ रन बनाएपछि ८ विकेटले विजयी भएको थियो । १ सय ८ बलमा १२ चौका र १ छक्का प्रहार गर्दै नेपाली समर्थक र खेलाडीलाई घरेलु मैदानमा निराश बनाएका थिए । जुन अकीबको करिअरको उच्च प्रर्दशन थियो । अमेरिकाविरुद्ध पहिलो खेलमा २ विकेट लिनुको साथै ७२ रन जोड्दै अलराउन्डर प्रर्दशन गरेका थिए । उनले अमेरिकाविरुद्ध दोस्रो खेलमा १ सय ५ रनको शतकीय इनिङका साथै ३ विकेट लिँदै सहज जित पक्का गराएका थिए ।

अकीब आफू नेपालको समर्थकबाट प्रभावित बनेको बताउँछन् । ‘हामीलाई नेपालमा नेपाली समर्थकले साथ, समर्थन र माया दिए । त्यो क्षण उत्कृष्ट रहयो । झन्डै १० हजार दर्शकसामु खेल्न उत्कृष्ट पल थियो,’उनले भने, ‘म नेपालसँगको पहिलो खेलमा दुर्भाग्यवश रनआउट हुन पुगेको थिएँ । तर नेपालविरुद्ध घरेलु समर्थकसामु खेल्ने अर्को अवसर बाँकी थियो । दोस्रो खेलमा प्रभाव छोड्न सफल भएँ ।’

आफ्नो करिअरको पहिलो ओडीआई शतक प्रहार गर्दा दर्शकको साथले उक्त क्षण अविस्मरणीय रहेको अकिब बताउँछन् । ‘मैले नेपाली समर्थकसामु ओडिआई करिअरको पहिलो शतक प्रहार गरे । जुन शतक बयान गर्ने मसँग शब्द छैन । नेपाली समर्थक साँच्चै अद्भुत छन् । मैले त्यस्तो माहोलमा कहिल्यै खेल्न पाएका थिइनँ ,’ उनले अनुभव साटे ।

अकीबले नेपाल र इमर्जिङ टिम्स एसिया कपमा भारतविरुद्ध प्रहार गरेको शतक करिअरको उत्कृष्ट बताउँछन् । अकीबले शतकसँगै पहिला नेपाली समर्थक अनि पेभिलिएनमा बसेका आफ्ना टोलीलाई अभिनन्दन गरेका थिए । नेपाली समर्थकलाई धन्यवादस्वरूप ओमानका क्रिकेट टोली, अफिसियल, प्रशिक्षकले सिरिजपछि फर्किने बेलामा टीयु मैदानमा नेपाली समर्थकलाई बल, जर्सी, टोपी लगाएका सामग्री मायाको चिनोस्वरूप दिएका थिए ।

सन् १९९२ सेप्टेम्बर ६ मा पाकिस्तानको सिलायकोटमा जन्मेका अकीबको आफ्नै देश पाकिस्तानबाट खेल्ने सपना नभएको पनि होइन । तर अवसर नपाउँदा उनको सपना पूरा हुन सकेन । बुबा मुहम्मद इलियास र आमा नसरीन खवरसहित परिवार अकीब ६ महिनाको हुँदा ओमान सरेको थियो । बुबा र दाईले व्यापारमा कडा मिहिनेत र संघर्ष गरेपछि परिवार ओमानमै स्थापित भएर बसेको अकिब बताउँछन् ।

अकीब खाली समयमा पाकिस्तान जाने गर्दछन् । त्यहिं अभ्यास पनि गर्छन् । पाकिस्तानको टोलीबाट खेल्न पाएमा सपना साकार हुने बताउँछन् । ‘मैले दुबईमा केहि प्रमुख प्रतियोगिता खेलें । त्यसमा धेरै पाकिस्तानका राष्ट्रिय खेलाडी खेलेका थिए । मैले ब्याट्सम्यानको रुपमा खेल्दै राम्रो प्रर्दशन पनि गरे । मलाई सबैले पाकिस्तानको टोलीबाट खेल्न प्रयास गर्न सल्लाह दिएका थिए । तर म कारणवश यूएईबाट पाकिस्तान जान सकिन र फर्कन पर्यो । त्यसैले आफ्नो देशबाट खेल्न सकिन’, उनले भने,’ त्यसपछि मैले घरेलु प्रतियोगितामा उत्कृष्ट प्रर्दशनका साथ ओमानको टोलीबाट खेल्न थालें ।’

अकीब नेपाली क्रिकेटमा प्रतिभा खेलाडीको कुनै कमी नरहेको बताउँछन् । ‘नेपालका खेलाडीमा निकै प्रतिभा छ । बलिङ स्तरिय छ । खेलाडी फिट छन् । तर नेपालको ब्याटिङ लाइनअपमा भने धेरै समस्या देखिन्छ । ब्याटिङमा स्थिरता हुनुपर्छ । त्यसको लागि सबैले ब्याटिङ सुधारको लागि पहल र ध्यान दिनुपर्छ ,’ अकिबले थपे ।

ओमान क्रिकेट टोली राम्रो बाटोमा हिँडिरहेको अकिबको अनुभव छ । ‘हाम्रो टोली धेरै सन्तुलित छ । हाम्रा अनुभवी ओपनरले राम्रो सुरुवात दिन्छन् । मध्यक्रममा सन्तुलन छ । कप्तान उत्कृष्ट छन् । म, जीशान, नदीम, सुरज र सन्दीप लगायतले ब्याटिङमा राम्रो गरिरहेका छौं । अन्य पनि राम्रो गर्दै आएका छन्,’ उनले थपे,’ बलिङमा बिलाल खान छन्, जो एसोसिएटकै उत्कृष्ट बलरमा पर्छन । पाकिस्तानबाट यु१९ खेलेका फैयाज बुट, नदीम, अनुभवी स्पिनर जीशान, खाबर अनि म पनि छुँ ।’

अकिबले आफ्नो लक्ष्य जुनसुकै स्तरमा पनि उत्कृष्ट प्रर्दशन गर्ने रहेको बताउँछन् । ‘केहि विश्व कीर्तिमान पनि आफ्नो नाममा लेखाउन चाहन्छु । पाकिस्तानी खेलाडी भएको नाताले इन्डियन प्रिमियर लिग(आइपिएल) खेल्न पाउन्न । तर पनि बिग ब्यास, पाकिस्तान सुपर लिग, नेपालको एभरेष्ट प्रिमियर लिग, क्यारेवियन प्रिमियर लिग लगायतका अन्य फ्रेन्चाइज लिग खेल्ने सपना छ’, उनले भने ।

ओमान क्रिकेट टोलीको आवको लक्ष्य टेष्ट मान्यता प्राप्त गर्ने रहेको र त्यसै अनुसार अघि बढेको बताउँछन् । त्यसको लागि खेलाडीको फिटनेश र क्षमता वृद्धीमा ध्यानदिनु पर्ने उनको बुझाई छ ।

अकीबको विचारमा करण केसी नेपालका एक उत्कृष्ट अलराउन्डर हुन् । सन्दीपले पनि राम्रो गर्दै आएको बताउँछन् । विशेषत नेपालको समर्थकली खेलाडीलाई निकै हौसला मिल्ने उनको बुझाइ छ । ‘नेपाली खेलाडी फिट र प्रतिभाशाली छन् । नेपाली क्रिकेटले समर्थकलाई न्याय गरिरहेको छ । साच्चै समर्थक अद्भुत छन् । नेपाली क्रिकेटलाई समर्थकले हृदयदेखि माया, सम्मान, हौसला बढाउनुको साथै उत्पेरणा र उर्जा प्रदान गर्दछन्,’ उनले भने, ‘नेपाली समर्थक नेपाली क्रिकेटका तारा हुन् । त्यसैले नेपाली समर्थकलाई ओमान र पाकिस्तानको तर्फबाट मेरो हृद्धयदेखि सम्मान र धन्यावाद ।’

अकीब नेपाली समर्थकसामु पुन: खेल्न आतुर छन् । उनको यो इच्छा फ्रेन्चाइज टि२० लिगबाट पुरा हुनेमा आशावादी छन् । नेपालमा आफूले पाएको माया र सम्मान अद्भुत रहेको हुँदा कहिल्यै भुल्न नसक्ने बताउँछन् ।