एजेन्सी – इन्डियन प्रिमियर लिग (आइपिएल) को १३ औं संस्करण संयुक्त अरव इमिरेट्स (युएई) मा हुने सम्भावना रहेको छ ।

कोरोना भाइरस महामारीको कारण भारतमा यस वर्ष आइपिएल गर्ने सम्भावना न्यून भएपछि भारतीय क्रिकेट कन्ट्रोल बोर्ड (बिसिसिआई) ले युएईमा गर्ने सोच बनाएको छ । शुक्रबार बसेको बिसिसिआईको भर्चुअल बैठकले आइपिएल आयोजना बारे ठोस निर्णय भने गर्न सकेन ।

बिसिसिआई अक्टोबर नोभेम्बरमा अष्ट्रेलियामा हुने टि२० विश्वकप अन्तर्राष्ट्रिय क्रिकेट परिषद् (आइसिसी) ले स्थगित गर्ने आशामा छ । बिसिसिआईलाई युएई क्रिकेट बोर्ड र श्रीलंका क्रिकेट बोर्डले आफ्नो देशमा आइपिएल गर्न प्रस्ताव गरेका थिए । यसै वर्ष पाकिस्तानमा सेप्टेम्बरमा हुने तय भएको टि२० एसिया कप स्थगित भएको छ । बिसिसिआईले आइपिएल सेप्टेम्बर देखी नोभेम्बरकोबीचमा गर्ने सोच बनाएको छ ।

यसअघि सन् २०१४ मा भारतमा आम निर्वाचनको कारण युएईमा आइपिएलका केहि खेल भएका थिए । सन् २००९ मा आम निर्वाचनकै कारण आइपिएलको पूरै संस्करण दक्षिण अफ्रिकामा भएको थियो ।

युएईमा ५६ हजार ४ सय २२ जनामा कोरोना संक्रमण देखिदा ४८ हजार ४ सय ४८ जनालाई ठिक भइसकेको छ । ३ सय ३७ जनाको मृत्यु भएको छ । भारतमा १० लाख भन्दा बढीमा संक्रमित हुँदा २६ हजार बढीको मृत्यु भई सकेको छ । सोमबार आइसिसी बैठक बस्दै छ । आइसिसीले टि२० विश्वकप स्थगित गर्छ भने आइपिएल गभर्निंग काउन्सिले बैठक गरेर सरकारको सल्लाहमा अन्तिम निर्णय लिने बुझिएको छ ।

आइपिएल ५ देखि ६ हप्तामा सक्ने बिसिसिआईको योजना छ । बिसिसिआईका अध्यक्ष सौरभ गांगुलीले टि२० विश्वकप स्थगित भएमा मात्र आइपिएल गर्न सकिने बताउँदै आएका छन् । आइसिसीले आफ्नो निर्णय नगर्न सम्म केहि भन्न नसक्ने गांगुलीले बताउँछन् । यता आइपिएल गर्न युएई उत्सुक छ । दुबई स्पोर्ट्स सिटीका प्रमुख सलमान हनिफले आइपिएल गर्न युएई तयार रहेको बताएका छन् ।

गत वैशाखमा कोरोनाको कारण आइपिएल अनिश्चित समय सम्मको लागि स्थगित भएको थियो । यस वर्ष आइपिएल नभएको खण्डमा बिसिसिआईलाई ४ हजार करोडभन्दा बढी भारतीय रुपैयाँ घाटा लाग्ने छ ।