एजेन्सी – स्टार अलराउन्डर बेन स्टोक्सले अर्को साता वेस्टइन्डिज विरुद्ध हुने टेस्ट सिरिजको पहिलो खेलमा इंग्ल्यान्डको कप्तानी गर्ने भएका छन् ।

स्थायी कप्तान जो रुटले पहिलो टेस्ट गुमाउने भएपछि उनको स्थानमा स्टोक्सले नेतृत्व गर्न लागेका हुन् । स्टोक्सले पहिलो पटक कप्तानको जिम्मेवारी वहन गर्नेछन् । रुटले बुधबार हुने वार्मअप खेल समेत गुमाउनेछन् । रुट र उनको श्रीमती क्यारीको दोस्रो सन्तान जन्मन लागेकाले उपलब्ध नहुने भएका हुन् ।

रुटले बच्चाको जन्मपछि सात दिन सेल्फ आइसोलेसनमा बसेर मात्र टोलीमा आबद्ध हुनेछन् । उनी जुलाई १६ मा हुने दोस्रो टेस्टका लागि भने जुलाई १३ सम्ममा टोलीमा उपस्थित हुने बुझिएको छ । स्टोक्सले कप्तानका रुपमा सकारात्मक सुरुवात गर्न केन्द्रित रहेको बताए ।

स्टोक्सले हालसम्म घरेलु क्रिकेटमा पनि कप्तानी गरेका छैनन् । इंग्ल्यान्डको टेस्ट क्रिकेटमा यसअघि फर्स्ट क्लास, लिस्ट ए अथवा टि२० टोलीको कप्तानी नगरी नेतृत्व लिने खेलाडी रहेका थिएनन्न । केभिन पिटरसनले घरेलु क्रिकेटमा कप्तानी नगरेपनि ओडीआई कप्तान रहेपछि टेस्टको कप्तानी गरेका थिए ।

रुट पहिलो टेस्टमा उपलब्ध नहुने भएपछि टोली छनोटमा भने दुविधा रहने भएको छ । डोम सिब्ले र रोरी बर्न्सले ओपनिङ गर्नेछन् । तेस्रो नम्बरको लागि ज्याक क्रली र जो डेनलीमा एकले मौका पाउनेछन् । रुटको अनुपस्थितमा यी दुवै अथवा ड्यान लरेन्सले नम्बर ४ मा खेल्नेछन् । यसबाहेक ओली पोप अथवा स्टोक्सले नम्बर ४ मा खेल्ने सम्भावना पनि छ ।

बोर्डले विकेटकिपर जस बटलरलाई पहिलो टेष्टमा उप– कप्तानको जिम्मेवारी दिएको छ । इंग्ल्यान्डले वेस्ट इन्डिजसँग तीन टेष्ट सिरिज खेल्ने छ । तीन टेष्ट सिरिजको लागि एक महिना अघिनै वेस्ट इन्डिजको टोली इंग्ल्यान्डमा रहेको छ । वेस्ट इन्डिज टोली हाल अभ्यासमा व्यस्त छ ।

वेस्टइन्डिज र इंग्ल्यान्डसँगको खेलसँगै झण्डैं चार महिनापछि अन्तर्राष्ट्रिय क्रिकेट फर्किने छ । पछिल्लो समय मार्च १३ मा अष्ट्रेलिया र न्युजिल्यान्डबीच एक दिवसिय खेल भएको थियो । इंग्ल्यान्ड र वेस्टइन्डिजका तीनै टेष्ट खेल बन्द रंगशालामा हुने छन् ।