काठमाडौं (हाम्रो खेलकुद) – ब्याटिङ नेपाली क्रिकेट टोलीको इतिहास देखिनै कमजोर पक्ष हो । अन्तर्राष्ट्रिय स्तरमा नेपालले गुमाएका अधिकांश अवसरमा प्रमुख कारण कमजोर ब्याटिङ रहँदै आएको छ ।

इतिहास फर्केर हेर्दा नेपाली क्रिकेट सिमित खेलाडीमा ब्याटिङमा निर्भर रहेको देखिन्छ । पछिल्लो समय भने युवा खेलाडीले त्यो समस्या सुल्झाउने सम्भावना देखाउन थालेका छन् । तर युवा खेलाडीले ठूलो सम्भावना र आशा देखाएपनि एकरुपता प्रर्दशन भने गर्न सकिरहेका छैनन् । अन्तर्राष्ट्रिय स्तरमा अर्धशतकको लागि संघर्ष गर्ने नेपाली ब्याट्सम्यानबाट शतक विरलै मात्रमा देखिन्छ ।

डेब्यु खेलमा नेपाली खेलाडीको प्रर्दशन आशा अनुसार कमैले गर्दछन् । विश्व क्रिकेटमा हेर्ने हो भने थुप्रै खेलाडी जसले डेब्युमै शतक लगाएका छन् । नेपाली क्रिकेटमा हालसम्म डेब्युमै शतक प्रहार गर्ने खेलाडी भने छैनन् । नेपाली क्रिकेट टोलीका तीन खेलाडी जसले डेब्यु खेलमा अर्ध शतक प्रहार गरेका छन् ।

३. ज्ञानेन्द्र मल्ल (नेदरल्यान्ड्सविरुद्ध, २०१८ अगष्ट)

राष्ट्रिय क्रिकेट टोलीका कप्तान ज्ञानेन्द्र मल्लले नेदरल्यान्ड्सविरुद्धको पहिलो खेलमा ओडिआई डेब्यु गरेका थिए । उक्त खेल ज्ञानेन्द्रको मात्र नभएर नेपालको पनि ओडिआई डेब्यु गरेको थियो । नेपालको लागि पहिलो ओडिआई अर्ध शतक प्रहार गरेका ज्ञानेन्द्र मल्लले ६१ बलमा ८ चौका सहित ५१ रन जोडेका थिए ।

ज्ञानेन्द्रलाई उक्त खेलमा २० औं ओभरको पहिलो बलमा मिचेल रिपनले एलविडब्लू आउट गरेका थिए । १ सय ९० रनको विजयी लक्ष्य पछ्याएको नेपाल ४१.५ ओभरमा अल आउट हुँदै १ सय ३४ रनमा अल आउट भएपछि ५५ रनले पराजित भएको थियो ।

२. सन्दीप जोरा (युएईविरुद्ध, २०१९ जनवरी)

युवा ब्याट्सम्यान सन्दीप जोराले सन् २०१९ मा युएईविरुद्धको तीन टि२० आई सिरिज अन्तर्गत पहिलो खेलमा डेब्यु गर्दै विश्व कीर्तिमानी अर्धशतक प्रहार गरेका थिए । जोराले ४६ बलमा ३ चौका र १ छक्का सहित अविजित ५३ रन जोडेपनि अन्य ब्याट्सम्यानले राम्रो प्रर्दशन नगर्दा नेपाल २१ रनले पराजित भएको थियो ।

उक्त अर्ध शतकसँगै जोरा टि२० आईमा अर्ध शतक प्रहार गर्ने विश्वकै कान्छा युवा खेलाडी बन्न पुगेका थिए । उक्त तीन ओडिआई सिरिज नेपाललाई २–१ ले जिताउन जोराले सिरिजभर महत्वपूर्ण प्रर्दशन गरेका थिए ।

१. कुशल मल्ल (अमेरिकाविरुद्ध, २०२० फेब्रुअरी)

गत फेब्रुअरीमा युवा ब्याट्सम्यान कुशल मल्लले आइसिसी विश्वकप लिग–२ अन्तर्गत त्रिकोणात्मक सिरिजमा अमेरिकाविरुद्ध ओडिआई खेलमा डेब्यु गरेका थिए । उक्त डेब्यु खेलमा कुशलले ५१ बलमा ४ चौका र ३ छक्का सहित ५० रन बनाउँदै कीर्तिमान कायम गरेका थिए ।

नेपाली ब्याट्सम्यान रोहित कुमार पौडेलको ओडिआईमा कम उमेरमा अर्ध शतक प्रहार गर्ने कीर्तिमान तोड्दै कुशलले आफ्नो नाममा गराएका थिए । संयोगनै मान्नुपर्छ उक्त खेलमा रोहितको स्थानमा कुशलले डेब्यु गरेका थिए । नेपाल त्यस खेलमा ३५ रनले विजयी भएको थियो ।