काठमाडौं (हाम्रो खेलकुद) – राष्ट्रिय क्रिकेट टोलीको प्रमुख प्रशिक्षकको रुपमा निकै चर्चामा रहेका भारतीय प्रशिक्षक लालचन्द राजपुत नेपाल आउने सम्भावना टाढिएको छ ।

जिम्बावे क्रिकेट बोर्डका अनुसार लालचन्द राजपुत सन् २०२१ सप्टेम्बर सम्म जिम्बावेमै रहने भएका छन् । राजपुत सन् २०१८ मे मा अस्थायी र अगष्टमा स्थायी रुपमा जिम्बावेको प्रमुख प्रशिक्षकमा नियुक्त भएका थिए । राजपुतको जिम्बावेसँग तीन वर्षे सम्झौंता २०२१ सप्टेम्बरमा सकिने छ । उक्त समय सम्म राजपुतले जिम्बावेमै बस्ने मनासय बनाएका हुन् ।

‘मेरो सम्झौंता सन् २०२१ सेप्टेम्बर सम्म जिम्बावेसँग रहेको छ । त्यसअघि अन्य टोलीमा जाने मेरो कुनै मनसाय छैन । म उक्त सम्झौंताको दायित्व पालना गर्नेछु’, राजपुतले जिम्बावे क्रिकेट बोर्डसँग भनेका छन् ।

जिम्बावे क्रिकेट टोली प्रमुख प्रशिक्षक बिनै अभ्यासमा फर्कि सकेको छ । तर प्रशिक्षक राजपुत भने मार्चदेखी कोरोना भाईरसको कारण भारतमा छन् । जिम्बावे क्रिकेट बोर्ड उनलाई हरारे जतिसक्दो चाडो फर्काउन खोजी रहेको छ । जिम्बावेले जुलाई–अगष्टमा अफगानिस्तानसँग सिरिज खेल्ने तयारीमा छ । नेपाली राष्ट्रिय क्रिकेट टोली चार महिना देखी विदेशी प्रशिक्षक बिहीन छ ।

भारतीय प्रशिक्षक उमेश पटवालले गत माघमा आईसिसी विश्वकप लिग–२ अन्तर्गत अमेरिका र ओमानसँग घरेलु मैदान टीयुमा भएको एक दिवसिय त्रिकोणात्मक सिरिजसँगै पदबाट राजिनामा दिएका थिए । पटवालले राजिनामा दिएसँगै राष्ट्रिय टोलीको प्रमुख प्रशिक्षकको जिम्मेवारी क्यानले विदेशी प्रशिक्षक नआउँदा सम्म जगत टमाटालाई दिएको थियो ।

टमाटाकै प्रशिक्षकमा नेपालले गत फागुनमा थाईल्यान्डमा एसीसी इस्टर्न रिजन टि२० क्रिकेट प्रतियोगितामा खराब प्रर्दशन गर्दै बाहिरिएको थियो । त्यसयता भने कोरोना भाइरसको कारण नेपालले कुनै अन्तर्राष्ट्रिय प्रतियोगिता र सिरिज खेलेको छैन ।

कोरोना भाईरसको कारण विश्वकप लिग–२ अन्तर्गत तीन अवे सिरिज अनिश्चित समय सम्मको लागि सरि सकेपछि हालसम्मको तालिका अनुसार आगमी डिसेम्बरमा मात्र नेपालको अन्तर्राष्ट्रिय प्रतियोगिता खेल्ने कार्यक्रम छ ।

लालचन्दसँगै भारतीय अर्का प्रशिक्षक मिथुन मन्हाससँग पनि क्यानले कुराकानी गरेको जनाएको थियो । पछिल्लो पटक जेठ २४ मा बसेको क्यान बोर्ड बैठकले कोरोनाको कारण कम्तिमा भदौ सम्म कुनै विदेशी प्रशिक्षक नेपाल आउन नमान्ने हुँदा त्यहि अनुसार नियुक्त गर्ने जनाएको थियो ।