काठमाडौं (हाम्रो खेलकुद) – धुर्मुस सुन्तली फाउन्डेसनको पहलमा चितवन भरतपुरको शान्तिपुरमा निर्माण भइरहेको गौतम बुद्ध अन्तर्राष्ट्रिय रंगशालाको काम लकडाउनका बीचमा पुनः सुरु भइसकेको छ ।

कोरोना भाइरस कोडिभ १९ को न्यूनिकरणका लागि सरकारले चैत ११ मा लकडाउन सुर गरेको थियो। त्यसको २ दिन अघि बाटै रंगशाला निर्माणको काम रोकिएका थियो । तर, फाउन्डेसनले बैशाख २० गते देखि आंशिक रुपमा काम सुरु गरेको थियो । यहि बीचमा फाउन्डेसनले रंगशालाको खर्च विवरण पनि सार्वजनिक गरेको छ ।

२०७५ देखि २०७७ साल जेठ २५ गतेसम्मको प्राप्त सहयोग रकम सार्वजनिक गरेको छ । फाउन्डेसनका अनुसार हालसम्म ११ करोड ३७ लाख ५० हजार ४ सय रुपैयाँ रंगशालामा निर्माणका लागि संकलन भएको छ । तर संकलन भए भन्दा बढी खर्च भएको फाउन्डेसनले विज्ञप्तीमार्फत जनाएको छ । हालसम्म १४ करोड ५२ लाख ९९ हजार २ सय रुपैयाँ खर्च भई सकेको बताइएको छ। त्यसअनुसार ३ करोड १५ लाख ४८ हजार ९ सय ९८ रुपैयाँ संकलन भन्दा बढी खर्च भएको छ ।

रंगशालाको मैदानको काम झन्डै ८० प्रतिशत सम्पन्न भइसकेको बताएको छ । भरतपुर नगरपालिकासँग जग्गा सम्झौतामा लिएपछि रंगशालाको निर्माण काम अघि बढेको हो । रंगशाला निर्माणका लागि झन्डै ३ अर्ब रुपैयाँ खर्च हुने अनुमान गरिएको छ । उक्त सम्पुर्ण रकम फाउन्डेसनले जनस्तरबाट उठाएर निर्माण गर्ने लक्ष्य लिएको छ ।