एजेन्सी— टेस्ट क्रिकेटमा पाकिस्तानका सर्वाधिक सफल ब्याट्सम्यान तथा पूर्वकप्तान युनिस खानलाई पाकिस्तान क्रिकेट बोर्डले इंग्ल्यान्ड भ्रमणको लागि ब्याटिङ प्रशिक्षकमा नियुक्त गरेको छ । पाकिस्तानले सेप्टेम्बरमा इंग्ल्यान्डमा हुने सिरिजमा तीन टेष्ट र तीन टि२० आई खेल्दैछ ।

सन् २००० देखि २०१७ सम्म पाकिस्तानबाट १ सय १८ टेष्ट खेल खेलेका युनिसले ३४ शतक र ३३ अर्ध शतक सहित कुल १० हजार ९९ रन बनाएका छन् । युनिस पाकिस्तानबाट टेष्टमा १० हजार रन बनाउने एक्लो ब्याट्सम्यान हुन् । करिअरकै उत्कृष्ट इनिङ सन् २००९ मा श्रीलंकाविरुद्ध ३ सय १३ रनको खेलेपछि उनी आइसिसी टेष्ट वरियतामा शीर्ष स्थानमा उक्लिन सफल भएका थिए । २००० देखि २०१५ सम्म २ सय ६५ ओडिआई खेलमा ७ हजार २ सय ४९ रन बनाएका छन् ।

‘मैले फेरी देशको लागि प्रतिनिधित्व गर्न पाउनु ठुलो सम्मान हो । मलाई फेरि इंग्ल्यान्डको चुनौतीपुर्ण रमाइलो यात्राको लागि अवसर प्रदान गरेकोमा ठूलो सम्मान पाएको महसुस गरेको छु’, युनिसले थपे, ‘पाकिस्तानको टोलीमा केहि उत्कृष्ट प्रतिभाशाली खेलाडी छन् । उनीहरु अझ धेरै उचाइमा पुग्न सक्छन् । उनीहरुलाई अझ राम्रो बनाउन प्रशिक्षणमा अन्य प्रशिक्षकसँग मिलेर सकेसम्म प्रयास गर्ने छौं ।’

युनिसलाई स्वागत गर्दै पाकिस्तानका प्रमुख छनोटकर्ता तथा प्रशिक्षक मिस्बाह उल हकले लेखेका छन्, ‘युनिस खान तिमीलाई स्वागत छ । हाम्रो क्रिकेट करिअर लगभग एकै समय चलेको छ । हामी एक अर्कालाई राम्रोसँग चिन्छौं । हामीले हातेमालो गर्दा पाकिस्तानले सबैभन्दा टेस्टमा ऐतिहासिक र अविस्मरणीय उपलब्धि हात पारेको थियो ।’

त्यसैमा उनले थपे ‘युनिस अनुशासित र मेहेनती ब्याट्सम्यान मात्र होइनन्, एक उत्कृष्ट फिल्डर र रणनिती बुझ्ने व्यक्ति हुन् । मलाई आशा छ, युनिसबाट हाम्रा युवा खेलाडीले धेरै कुरा सिक्नेछन् ।’