एजेन्सी – श्रीलंका क्रिकेट बोर्डले तीव्र गतिका बलर शेहान मदुशंकालाई निलम्बन गरेको छ । लागुऔषध सहित प्रकाउ परेपछि बोर्डले उनलाई कारवाही गरेको हो ।

श्रीलंका क्रिकेट बोर्डले मंगलबार प्रेस विज्ञप्ती जारी गर्दै उनीमाथि छानबिन हुँदासम्म सबै क्रिकेट गतिविधिबाट निलम्बित गरेको जनाएको छ । श्रीलंकामा हाल कोरोना भाइरस (कोभिड१९) रोकथामको लागि लकडाउन चलिरहेको छ । तर शेहानले नियम उल्ङ्घन गर्दै कार चलाउँदै गर्दा भेटिएका थिए । उनको साथबाट २ ग्राम हेरोइन (ड्रग्स) बरामद भएको थियो ।

छानबिनका लागि शेहान दुई हप्ता प्रहरीको हिरासतमा रहनेछन् । योसँगै उनी केहि समय प्रतिबन्धमा पर्न सक्ने खतरा बढेको छ । शेहान र उनको साथीलाई हिरोइन राखेको आरोपमा शनिबार श्रीलंका प्रहरीले प्रकाउ गरेको अन्तर्राष्ट्रिय सञ्चार माध्यमले जनाएका छन् ।

शेहानले श्रीलंकाबाट १ ओडिआई र २ टि२० आई खेलेका छन् । उनले सन् २०१८ जनवरीमा बंगलादेशविरुद्ध ओडिआई डेब्यु खेलमा ह्याट्रिक गर्दै ६.१ ओभरमा १ मेडन सहित २६ रन खर्चिदै ३ विकेट लिएका थिए । शेहानले त्यसैवर्ष टि२० आईमा फ्रेबुअरीमा बंगलदेशविरुद्धनै डेब्यु गरेका थिए । उनले टि२० आईमा २ विकेट लिएका छन् ।

१८ फ्रबुअरीमा अन्तिम टि२० आई खेलेका शेहान चोटका कारण त्यस यता भने श्रीलंका क्रिकेट टोली बाहिर रहँदै आएका थिए । उनले १४ प्रथम श्रेणी, १९ लिष्ट ए र १७ टि२० एस खेलेका छन् ।