एजेन्सी – भारतीय क्रिकेट टोलीका ओपनर रोहित शर्मालाई टि२० आई क्रिकेट टोलीको कप्तान बनाउनु पर्ने पुर्व तीव्र गतिका बलर अतुल वासनले बताएका छन् ।

भारतीय तीनै शैलीको कप्तानी विराट कोहलीले गर्दै आएका छन् । रोहित टि२० आई र ओडिआईको उपकप्तान समेत हुन् । विराटको अनुपस्थितिमा रोहितले ओडिआई र टि२० आई दुवैमा भारतीय क्रिकेट टोलीको कप्तानी गरिसकेका छन् ।

‘मेरो विचारमा भारतले तीनै शैलीको कप्तानी विराटलाई दिनु हुँदैन । कम्तिमा एक शैलीमा फरक कप्तान हुनुपर्छ । विराट तीनै शैलीको कप्तानी गर्न चाहन्छन् । तर तीनै शैली एकै कप्तानले सम्हाल्दा दबाब बढी हुन्छ । रोहितले कप्तानीमा आफुलाई प्रमाणित गरिसकेका छन् । त्यसैले विराटलाई दबाब कम गर्न रोहितलाई टि२० टोलीको कप्तान बनाउनुपर्छ’, वासनले भनेका छन् ।

‘टेष्टसँगै आगामी एकदिवसिय विश्वकपसम्म कप्तानी विराटलाईनै दिनुपर्छ । रोहितको टि२० आईमा रेकर्ड उत्कृष्ट छ । इन्डियन प्रिमियर लिग (आइपिएल) मा रोहितले आफुलाई प्रमाणित गरि सकेका छन्’, उनले भने ।

मुम्बई इन्डियन्सले रोहितको कप्तानीमा आइपिएलको उपाधि चार पटक जितेको छ । विराटको कप्तानीमा रहेको रोयल च्यालेन्जर्स बेंगलोर भने हाल सम्म उपाधिविहीन छ । रोहितको कप्तानीमा भारतले सन् २०१८ को एसिया कप तथा निदादास  ट्रफी जितेको थियो ।

रोहितले १० ओडिआई खेलमा कप्तानी गर्दा ८ मा जित दिलाएका छन् । १९ टि२० आई खेलमा १५ खेलमा जित दिलाएका छन् । वर्तमान क्रिकेटका उत्कृष्ट ओपनर रोहित विराट पछिका भारतीय क्रिकेट टोलीका कप्तानका सर्वाधिक बलिया दाबेदार खेलाडी पर्दछन् ।