एजेन्सी – बंगलादेशका विकेटकिपर मुश्फिकुर रहिमको ऐतिहासिक ब्याट पाकिस्तानका पूर्वकप्तान शाहिद अफ्रिदीले २० हजार अमेरिकी डलरमा किनेका छन् ।

गत वैशाखमा कोरोना भाइरस (कोभिड१९) का बिरामीहरुलाई सहयोग गर्न मुश्फिकुरले सन् २०१३ मार्चमा श्रीलंकाविरुद्ध टेष्टमा दोहोरो शतक प्रहार गर्दा आफुले प्रयोग गरेको ब्याट लिलाम गर्ने घोषणा गरेका थिए । ‘रहिमले जुन काम गरेका छन् त्यो जनताको लागि एक सच्चा नायकले मात्र गर्न सक्छ । हामी एक कठिन परिस्थीतिसँग जुधिरहेका छौं । सबैलाई एक दोस्रोको सहयोगको आवश्यक पर्दछ । मलाई बंगलादेशबाट जुन माया मिलेको छ त्यो सधैं याद गरिरहेको छु । म पाकिस्तानको तर्फबाट रहिमको ब्याट किनेर सहयोगको हिस्सा बन्न चाहान्छु, पूरा पाकिस्तान र शाहिद अफ्रिदी फाउन्डेसन’, अफ्रिदीले भनेका छन् ।

‘अफ्रिदीले मेरो ब्याट किन्दा मलाई गर्व महशुस भएको छ । अक्सनमा केहि मान्छे धाँधली गर्न प्रयास गर्दै थिए । जसले मैले अक्सन रद्द गर्ने निर्णयबारे सोचेको थिएँ । अफ्रिदीले मलाई सम्पर्क गरे र ब्याट किने’, मुश्फिकुरले भने ।

रहिम बंगलादेशबाट टेष्टमा तीन दोहोरो शतक प्रहार गर्ने एक्लो ब्याट्सम्यान हुन् । सन् २०१८ मा र २०२० मा मुश्फिकुरले जिम्बावेविरुद्ध क्रमश: २ सय १९ र २ सय ३ रनको अविजित इनिङ खेलेका थिए । रहिमले श्रीलंका विरुद्ध सन् २०१३ मा बंगलादेशको पहिलो दोहोरो शतक पूरा गर्दै कीर्तिमान रचेका थिए । रहिम टेष्टमा दुई शतक प्रहार गर्ने पहिलो विकेटकिपर समेत हुन् ।