एजेन्सी – भारतीय क्रिकेट टोलीका कप्तान विराट कोहली भन्दा पुर्व कप्तान तथा विकेटकिपर महेन्द्र सिंह धोनीको कप्तानीमा खेल्न मन पर्ने ओपनर शिखर धवनले बताएका छन् ।

धवनले भारतीय पुर्व खेलाडी इरफान पठानसँग अन्तर्वार्ताका क्रममा भने, ‘म विराट र धोनीको कप्तानीमा मात्र भारतीय टोलीबाट खेलेको छु । जसमा कोहलीको भन्दा धोनीको कप्तानी मनपर्छ ।’ धवनले धोनीकै कप्तानीमा राष्ट्रिय टोलीबाट डेब्यु गरेका थिए ।

धवनले आफ्नो उत्कृष्ट ब्याटिङ जोडीमा ओपनर रोहित शर्मा रहेको बताएका छन् । सन् २०१३ देखी भारतीय सिमित ओभरको खेलमा रोहित र धवनलेसँगै ओपनिङ गर्दै उत्कृष्ट प्रर्दशन गरिरहेका छन् । सिमित ओभरमा रोहित र धवन वर्तमान क्रिकेटका उत्कृष्ट ओपनर जोडी मानिन्छन् ।

धवनले कोहली र रोहितको प्रशंसा गर्दै भने, ‘वर्तमान समयमा कप्तान विराट कोहली भारतीय टोलीका उत्कृष्ट ब्याट्सम्यान हुन् । रोहितले विश्वकपमा कमाल गरे । उत्कृष्ट लयलाई कायम राख्दै उत्कृष्ट ५ शतक प्रहार गरे । अष्ट्रेलियाका तीब्र गतिका बलर मिचेल स्टार्कको बल खेल्न अन्य बलरको तुलनामा कठिन लाग्छ ।’

पूर्व कप्तान महेन्द्र सिंह धोनीले एक दिवसिय विश्वकप, टि२० विश्वकप र च्याम्पियनसिप ट्रफी गरि आइसिसीको तीनै उपाधि जिताएका छन् । कोहलीले भने हालसम्म आइसिसीको ठुलो प्रतियोगिताको उपाधि जिताउन सकेका छैनन् । कोहलीको कप्तानीमा भारतले सन् २०१७ मा च्याम्पियनसीप ट्रफीको फाइनलमा पाकिस्तानसँग लज्जास्पद हार बेहोर्दा सन् २०१९ को एकदिवसिय विश्वकप सेमिफाइनलमा न्युजिल्यान्डसँग पराजित हुँदै बाहिरिएको थियो ।