एजेन्सी – पाकिस्तान क्रिकेट बोर्ड (पिसिबी) ले युवा ब्याट्सम्यान बाबर आजमलाई ओडीआई टोलीको कप्तानमा नियुक्त गरेको छ । आजमलाई पिसिबीले २०२०–२१ को सिजनको लागि कप्तानको जिम्मेवारी दिएको जनाएको छ ।

गत कात्तिकमा पिसिबीले शरफराज अहमदलाई कप्तानबाट हटाउँदै बाबरलाई टि२० र अजहर अलीलाई टेष्टको नेतृत्व दिएको थियो । बाबरले ५ टि२० आईमा कप्तानी गरिसकेका छन् । जसमा समान २ मा जित र हार बेहोर्दा १ खेल नतिजाविहिन छ । वर्तमान क्रिकेटका उत्कृष्ट ब्याट्सम्यान मध्यका एक बाबर आजमले २६ टेष्ट, ७४ ओडिआई र ३८ टि२० आई खेलेका छन् । बाबर टेष्ट वरियातमा पाँचौं, ओडिआईमा तेस्रो र टि२० मा शीर्ष स्थानमा छन् ।

शरफराजको कप्तानीमा पाकिस्तानले सन् २०१७ मा भारतलाई च्याम्पियन्स ट्रफीको फाइनलमा हराउँदै उपाधि जितेको थियो । शरफराजले पाकिस्तानलाई टि२० आई वरियतामा पनि शीर्ष उकालेका थिए । तर दुई साता अघि पाकिस्तानले २७ महिनादेखिको टि२० शीर्ष वरियता गुमाई सकेको छ ।

विश्वकपमा पाकिस्तान समुह चरणबाटै बााहिरिएपछि शरफराजको कप्तानी, प्रर्दशन र फिटनेशलाई लिएर चर्को आलोचना भएपछि पिसिबीले कप्तानबाट हटाएको थियो । विकेटकिपर समेत रहेका शरफराजको पछिल्लो समय पर्दशन खराब रहँदै आएको छ । २०२०–२१ सिजनमा पाकिस्तानले ९ टेष्ट, ६ ओडिआई र २० टि२० आईसँगै एसिया कप र टि२० विश्वकप २०२० खेल्ने कार्यतालिका छ ।