एजेन्सी – भारतीय क्रिकेट टोलीका कप्तान विराट कोहलीले बलरलाई विपक्षी ब्याट्सम्यानले भन्दा बढी दबाब दिने भारतीय टोलीका पूर्व खेलाडी आशिष नेहेराले बताएका छन् ।

भारतका लागि लामो समय खेलेका तीव्र गतिका बलर नेहेराले बलरले विकेट लिन नसकेको खण्डमा कप्तान विराटले विपक्षी ब्याट्सम्यानले भन्दा बढी दबाब दिने बताएका हुन् । ‘खेलाडीलाई कप्तानले सधैं आफ्नो दबाबमा राख्नुपर्छ, टिमलाई अघि लगेर जान यो आवश्यक पनि पर्छ । मेरो विचारमा पछिल्लो डेढ दुई वर्षमा कोहलीले खेलाडीमा चाहिने भन्दा बढी दबाब राखेका छन् । बलरले विकेट नलिएको खण्डमा विपक्षी ब्याट्सम्यानले भन्दा बढी स्वयं कप्तान कोहलीले दबाब दिन्छन्, जुन कुरा राम्रो होईन । विराटले यो बानी सुधार गर्नुपर्छ’, उनले भने ।

नेहेराले टोलीमा म्याच विनरको कमी हुनुपनि चिन्ताजनक रहेको बताए । ‘ रोहित शर्मा, विराट र जसप्रित बुमराहलाई छाड्ने हो भने अहिले भारतसँग चौथो म्याच विनर खेलाडी म देख्दिन । कोहलीले खेलाडी छनोट कम गर्दा परिवर्तन धेरै गरेका छन् । युवा खेलाडीमा क्षमता धेरै छ । तर ती खेलाडीलाई केहि समय मौका दिनुपर्छ,’ नेहेराले भने ।

ब्याटिङ लाइनअप पनि अझसम्म सुदृढ हुन नसक्नु राम्रो पक्ष नभएको उनको बुझाइ छ । ‘एकदिवसिय खेलमा आज पनि पाँच र छैटौं नम्वरको ब्याट्सम्यान को हो भन्न सक्ने अवस्था छैन । महेन्द्र सिंह धोनी पछि हेरिएका विकेटकिपर ऋषभ पन्तले न्युजिल्यान्ड भ्रमणमा पानी बोक्नु परेको थियो । पन्तमा धेरै क्षमता छ । हो, पन्तले केहि अवसर सदुपयोग गर्न सकेनन् । तर पानी बोकाउनु पक्कै राम्रो होइन’, नेहेराले भने ।