काठमाडौं (हाम्रो खेलकुद) – धादिङ जिल्लामै पहिलो पटक क्रिकेट रंगशालाको निर्माण कार्य सुरु भएको छ । बेनिघाट रोराङ गाउँपालिका स्थित बेनिघाट ५ बाहुनटारमा शुक्रबारदेखि क्रिकेट रंगशाला निर्माण कार्य सुरु भएको हो ।

शुक्रबार क्रिकेट रंगशालमा जाने सडक निर्माणको कार्य सुरु भएको छ । सुरुमा स्थानिय खेलप्रेमी, समर्थक र क्रिकेट अभियान्ताले पहल गर्दै गाउँपालिकामा प्रस्ताव लगेका थिए । गाउँपालिकाले डिपिआर तयार पार्दै संघिय सरकारलाई पठाएको थियो । संघिय सरकारले ५० लाख विनियोजन गरेपछि रंगशाला निर्माण कार्य सुरु भएको हो ।

तीन वर्षमा रंगशाला निर्माणको कार्य सम्पन्न गर्ने लक्ष्य छ । रंगशालाको कुल खर्च १५ करोड अनुमान गरिएको छ । क्षेत्रिय स्तरको रहने यस रंगाशालाको क्षमता ५ हजार समर्थक अट्ने प्याराफिट बन्ने छ ।  ‘शुक्रबारबाट मैदानको निर्माण कार्य सुरु गरेका छौं । पहिलो चरणमा मैदानमा बाटो लैजान र सम्माउने कार्य हुने छ । मैदानको शिलान्यास यसै हप्ता गर्नेछौं’, अनुगमन समितीका सदस्य दिपेश कडेलले हाम्रो खेलकुदलाई भने ।

‘मैदानको थोरै भागमा केहि विवाद पनि छ । हामी स्थानियलाई राखेर जग्गा विवाद पनि अन्त्यमा पुर्याएका छौं । मैदान बनाउने ठाउँ खोल्सो भएको हुँदा सम्माउन यो पटकको बजेट त्यसमा बढी खर्च हुने अनुमान गरेका छौं, यो पटक मैदानको आकार बन्ने छ भने अर्कोवर्ष थप कार्य बढ्ने छ’,दीपेशले भने ।

‘मैदानको निर्माणपछि धादिङको क्रिकेटले अझैं फड्को मार्ने छ । राष्ट्रिय तथा अन्तर्राष्ट्रिय खेलाडी धादिङबाट उत्पादन हुने छ । अर्कोतर्फ धादिङ जिल्ला क्रिकेट संघ गठन प्रक्रियामा छौं,’ उनले टुंग्याए ।