एजेन्सी – भारतीय क्रिकेट टोलीका २५ वर्षिय युवा स्पिनर कुलदीप यादवले आफूले कुनै समय आत्महत्या गर्ने सोच सम्म पुगेको बताएका छन् ।

कुलदीपले आफु १३ वर्षको हुँदा आत्महत्या गर्ने सोच बनाएको बताएका हुन् । ‘म १३ वर्षको थिएँ । तर उत्तर प्रदेशको यु१५ टोलीमा छनोट हुन सकिन । टोलीमा पर्नको लागि कडा मिहिनेत गरेको थिएँ । जसको कारण म धेरै दुखि भएँ । आत्माहत्या गर्ने सोचमै पुगेको थिएँ’, कुलदीपले भनेका छन् ।

‘उत्तर प्रदेशको यु१५ टोलीमा छनोट नभएपछि एक समय क्रिकेट छोड्ने निर्णय गरेको थिएँ । तर मेरो बुबाले मलाई सधैं हौसला र मनोबल बढाई राख्नुभयो । त्यसैले त आज म यो स्थानमा छु’, कुलदीपले भने ।

कुलदीपले कोलकाता नाइट राइडर्सबाट इन्डियन प्रिमियर लिग (आइपिएल) खेल्छन् । गतवर्ष भने कुलदीपको प्रर्दशन राम्रो हुन सकेको थिएन । जुन आइपिएलमा आफुले राम्रोसँग अभ्यास र मिहिनेत गर्न नपाएको बताएका छन् । यस पटकको आइपिएलको लागि आफु पुर्ण रुपमा तयार रहेको बताएका छन् ।

कुलदीपले आफु सफल हुनुमा भारतीय क्रिकेट टोलीका पुर्व कप्तान गौतम गम्भिर र पाकिस्तानका वसीम अकरमको पनि ठुलो हात रहेको बताएका छन् । यी दुवैले आफुलाई मानसिक रुपमा तयार पार्नुको साथै सधैं मनोबल बढाएको बताएका छन् ।

कुलदीपले ६ टेष्टमा २४ विकेट लिएका छन् । त्यस्तै ६० ओडिआई खेलमा १ सय ४ विकेट र २१ टि२० खेलमा ३९ विकेट लिएका छन् । कुलदीप पछिल्लो केहि वर्ष यता भारतीय क्रिकेट टोलीमा सिमित ओभरको खेलमा पहिलो रोजाईमा पर्दै आएका छन् ।