एजेन्सी – भारतीय क्रिकेट टोलीका कप्तान विराट कोहली र दक्षिण अफ्रिका पुर्व कप्तान एबि डी भिलियर्सले मिलेर ब्याट, जर्सि र ग्लभ्स (पञ्जा) लिलामी गर्ने भएका छन् ।

कोहली र डिभिलियर्सले विश्वभर महामरीको रुप लिएको (कोभिड१९) प्रभावितलाई सहयोग गर्ने उदश्यले एकसाथ इन्डियन प्रिमियर लिग (आइपिएल) २०१६ मा रोयल च्यालेन्जर्स बेंगलोरबाट गुजरात लायन्सविरुद्ध प्रयोग गरेको ब्याट, ग्लभ्स र जर्सि लिलामी गर्ने निर्णय सामाजिक सञ्जाल इन्स्टाग्राम लाइभ क्रममा बताएका छन् । जसबाट प्राप्त रकम भारत र दक्षिण अफ्रिकामा कोरोना विरुद्धको लडाईंको राहत कोषमा जाने छ ।

डीभिलियर्सले उक्त खेलमा प्रयोग गरेको ग्रिन जर्सि, ब्याट र ग्लभ्स र कोहलीले ब्याट र ग्लभ्स सार्वजनिक लिलामीमा राख्ने छन् । सन् २०१६ मा गुजरात लायन्सविरुद्ध बेंगलोरले २० ओभरका ३ विकेटको क्षतिमा २ सय ४८ रन बनाएको थियो । दोस्रो विकेटका लागि कोहली र डी भिलियर्सले २ सय २९ रनको उत्कृष्ट साझेदारी गरेका थिए ।

कोहली १ सय ९ रनमा आउट हुँदा डी भिलियर्स १ सय २९ रनमा अविजित रहेका थिए । डी भिलियर्सले उक्त खेलमा ५२ बलमा १० चौका र १२ छक्का तथा कोहलीले ५५ बलमा ५ चौका र ८ छक्का प्रहार गरेका थिए । उक्त खेलमा बेंगलोर १ सय ४४ रनले विजयी भएको थियो ।