काठमाडौं (हाम्रो खेलकुद) – क्रिकेट खेलाडी संघ नेपाल (सिप्यान) ले नेपाल सकारले कोभिड १९ संक्रमण रोकथाम नियन्त्रण तथा उपचारका लागि स्थापना गरेको कोषमा सहयोग रकम जम्मा गरेको छ ।

विश्वभर फैलिएको कोरोना भाइरस कारण सिप्यानले वर्षेनी आयोजना हुने एनसिसिएस सिप्यान क्रिकेट अवार्ड रद्द गर्दै पुरस्कार रकम ४ लाख ६२ हजार शुक्रबार कोषमा जम्मा गरेको हो । सिप्यानका अध्यक्ष मनीषराज पाण्डे र महासचिव पारस खड्काले यसअघि नै विज्ञप्ती जारी गर्दै कोरोना भाइरसको कारण स्थगित गर्नुका साथै अवार्डको पुरस्कार रकम नेपाल सरकारले कोभिड १९ संक्रमण रोकथाम, नियन्त्रण तथा उपचारका लागि स्थापना गरेको कोषमा प्रदान गर्ने जानकारी गराएका थिए ।

सिप्यानले विभिन्न ५ विधामा क्रिकेट खेलाडी पुरुष, महिला, उदीयमान क्रिकेट खेलाडी, वर्षको उत्कृष्ट क्षण र लाइफटाइम अचिभमेन्ट अवार्ड प्रदान गर्ने सार्वजनिक गरेको थियो । अवार्ड। अन्तर्गत उत्कृष्ट ५ विधामा दिने पुरस्कार रकम ४ लाख ६२ हजार रुपैयाँ कोषमा दिइएको छ । उत्कृष्ट महिला र पुरुष खेलाडीले समान १ लाख ३२ हजार रुपैयाँ तथा वर्ष उदीयमान क्रिकेट खेलाडी, वर्ष उत्कृष्ट क्षण र लाइफटाइम अचिभमेन्ट अवार्डको विजेताले समान ६६ हजार रुपैयाँ दिने घोषणा गरिएको थियो ।

शिक्षा क्षेत्रमा समर्पित संस्था एसिसिएस ग्रुपको मुख्य प्रायोजन रहेको अवार्डको अब अर्को संस्करण सन् २०२१ मा आयोजना गर्नेपनि सिप्यानले उल्लेख गरेको छ । कोरोना भाइरसकै कारण सिप्यानले चैत २१ गतेका लागि आयोजना गर्ने भनिएको अवार्ड स्थागित गरेको थियो ।

विश्वव्यापी रुपमा महामारीको रुप लिइरहेको कोरोना भाइरसका कारण १ लाख ४५ हजार भन्दा बढी मृत्यु भइसकेको छ भने २१ लाख भन्दा बढी संक्रमित भइसकेका छन् । नेपालमा पनि शुक्रबारसम्म ३० जनामा कोरोना भाइरसको संक्रमण देखिएको छ ।