एजेन्सी – पाकिस्तानका पूर्व खेलाडी शोएब अख्तरले कोरोना भाइरस (कोभिड१९) विरुद्धको लडाईको लागि पैसा उठाउन भारत र पाकिस्तानबीच तीन खेलको ओडीआई सिरिज राख्न प्रस्ताव गरेका थिए ।

जवाफमा भारतका पूर्व कप्तान कपिल देवले भारतलाई पैसाको आवश्यक नरहेको भन्दै रुखो जवाफ फर्काएका छन् । अख्तरले बुधबार पिटिआईसँग कुरा गर्दै कोरोना विरुद्धको लडाईको लागि पैसा उठाउन श्रृंखला सिरिज गर्न प्रस्ताव राखेका थिए । जसबाट राम्रो पैसा उठ्ने हुँदा कोरोना भाइरस विरुद्धको लडाईको लागि दुबै देशले खर्च गर्न मिल्ने बताएका थिए । तर कपिल देवले अस्विकार गर्दै यस्तो जवाफ दिएका हुन् ।

कपिलदेवले पनि पिटिआईसँग कुरा गर्दै भनेका छन्, ‘उनको आफ्नो विचार होला तर हामीलाई आर्थिक सहयोग जुटाउन आवश्यक छैन । हामीसँग पर्याप्त पैसा छ । हाम्रो प्रशासन मिलेर यो संकट टार्ने छन्, ‘त्यसैमा उनले थपे, ‘बिसिसिआईले यस महामरीको लागि ५१ करोड रुपैयाँ सहयोग गरेको छ । आवश्यक पर्छ भने अझै दिन पनि सक्छ । त्यसैले आर्थिक सहयोग जुटाउन आवश्यक छैन ।’

‘कोरोना भाइरस तत्काल सामान्य हुने सम्भावना छैन । यो अवस्थामा क्रिकेट आयोजना गर्नु भनेको खेलाडीलाई जोखिममा राख्नु हो । मेरो विचारमा आगामी ५,६ महिना सम्म क्रिकेटको बारे सोच्न सकिदैन । यो समय मात्र जीवन बचाउने हो । अवस्था सामान्य भएमा क्रिकेट सुरु हुने छ । खेल देश भन्दा ठुलो होइन,’ कपिल देवले भने ।

आन्तरिका विवादको कारण सन् २००८ देखी भारत र पाकिस्तानले द्वीपक्षीय सिरिज खेलेका छैनन् । दुवै टोलीले आइसिसी र एसिसीको प्रतियोगितामा मात्र एकआपसमा प्रतिस्पर्धा गर्दै आएका छन् ।